Dunay mga tunghaan nga walay klase

CEBU, Philippines - Nabalik na sa normal ang klase sa mga pangpublikong tunghaan dinhi sa Sugbo ug tibuok Central Visayas kagahapong adlawa gawas lang sa Negros Orientral nga maoy grabeng naapektuhan sa 6.9 magnitude nga linog niadtong Lunes sa udto.

Apan bisan sa pormal nga pahibawo sa Department of Education (DepEd)-7 pinaagi ni Assistant regional director Carmelita Dolangon ang pagbalik sa klase duna gihapoy pipila ka mga tunghaan nga pabiling wala magklase.

Usa na niini ang Guadalupe Elementary School ug ang Ramon Duterte National High School sa barangay Guadalupe tungod sa nangliki nilang mga edipisyo nga wala pa masusi sa mga engineers kung luwas pang klasehan.

Ang Administrative Assistant ug mathematics teacher sa Ramon Duterte National High School nga si Charlie Salve dihang nahinabi sa telepono sa Banat News miingon nga kagahapong adlawa pa gikatakdang susihon sa engineers ang mga ginagmay’ng liki sa ilang mga edipisyo.

Matud niya nga gimando usab sa ilang officer in charge nga si Faith Misa nga mopahigayon dayun sa klase kun mahuman na ang himuong inspeksyon.

Samtang ang principal sa Guadalupe Elementary School nga si Michael Cabase mibutyag sa Banat News nga dili gyud sila mobalik pagklase hangtud dili ma-inspeksyon ang walo ka school buildings ilabi na kadtong tag 4- storey building nga nakasinati og cracks atol sa pagtay-og sa kusog nga linog.

Hangtud kagahapon gi-cordoned ang tibuok palibot sa maong tunghaan aron way mga tinun-an ug magtutudlo nga makasulod sa tanang mga classroom paglikay sa peligro.

Si Dolangon midugang nga wala kaayuy mga dagkung kadaut ilabina sa mga school buildings dinhi sa Sugbo ug ubang dapit sa Central Visayas gawas lang sa mga cracks nga nasinati sa pipila ka school buildings.  - BANAT NEWS