CEBU, Philippines - Ang gipahigayong demolisyon sa kabalayan sa Borromeo Estate sa barangay Lawaan II ug III, dakbayan sa Talisay malinawon kaayo bisan may pagpamato, matud ni Sheriff Constancio Alimurung Jr., ang miimplementar sa demolition order sa korte kagahapon sa alas 10:00 sa buntag.
Kini agi og katumanan sa gibahad ni manlalaban Raul Sesbreño, ang tag–iya sa maong luna nga wala siyay gikahadlokan busa gipangandaman niya pag-ayo ang maong demolition.
Alang kang Sesbreño misamot na ang iyang kasuko uban ang kaisog sa pagpangita og hustisya karong nabuhis na ang kinabuhi sa iyang asawa pagpakigbugno batok sa mga tawong nanimuyo sa iyang luna.
Si Alimurung nga maoy gitahasan sa Regional Trial Court (RTC) Branch 18 sa pagpatuman sa demolition mibutyag nga nakasinati sila og pamato, apan walay nangaigo niini.
Gani pipila sa mga bato nga mitugpa sa ilang palibot gikan sa wala hiilhing tawo, iyang gipakita ngadto sa mga sakop sa media nga tag-ingon og kumo sa tawo ang gidak-on.
Miingon siya nga may nakakita sa usa ka tawong wala hiilhi nga mipasalipod sa parel nga semento ug maoy mipauwan og mga bato ngadto sa mga nangguba sa mga kabalayan.
Apan dihang gisusi sa kapolisan nga nagbantay sa palibot mikaratel og dagan ang maong tawo ug wala kini hidakpi.
Lima ka mga polis sa dakbayan sa Talisay ang gitahasan sa pagbantay sa lugar diin gipahigayon ang demolisyon kagahapon sa pagmintenar sa kahapsay ug kalinaw sa palibot.
Sa alas 2:00 sa hapon kagahapon ang pito ka mga tawo nga sakop sa demolition team nakalarot og pito ka mga balay.
Gitakda nga 40 ka mga balay nga gipanarok sa lote ni Sesbreño hutdon og guba.
Matud pa ni Alimurung nga hayan molanat pa og duha ka semana ang pagpangguba sa mga balay sa maong lugar tungod kay kasagaran sementado kini busa dili madali ang pagmaso niini. - BANAT NEWS