CEBU, Philippines - Kanselado ang klase dinhi sa Sugbo ug tibuok Central Visayas kagahapong adlawa usa ka adlaw human sa pagtay-og sa magnitude 6.9 nga linog niadtong Lunes sa alas 11:49 sa dayun nang udto samtang gisusi pa ang kaluwasan sa mga edipisyo sa mga tunghaan.
Apan daghan ang mga ginikanan ang nagbagulbol tungod sa langay nga pahibalo sa Department of Education Dep-Ed7 tungod kay daghan na ang mga ginikanan ang nakahatud sa ilang mga anak sa tunghaan ilabina kadtong mga elementarya.
Usa ka ginang nga taga Capitol dihang nahinabi sa Banat News miingon nga nausik lang iyang plete paghatud sa iyang anak nga nagtungha sa Guadalupe Elementary School tungod kay pag-abot niya kagahapon didto pa niya mahibaw-ing walay klase. Si Dep-Ed7 director Recarido Borgonia maoy mipahibawo sa usa ka estasyonan sa radyo sa pagkanselar sa klase kagahapon sa buntag tungod kay kinahanglang masusi pa sa mga engineers ang mga edipisyo kung walay dakong kadaot ug luwas klasehan tungod sa linog. Ang mga Dep-Ed engineers maoy gitahasan sa director nga mohimo og dinaliang pakisusi sa tanang mga school buildings sa mga publikong tunghaan.
Nasayran nga dunay daghang mga school buildings dinhi sa dakbayan ang nakasinati og pagpangliki tungod sa kusog nga linog ug apil na niini ang halos tanang school buildings sa Guadalupe Elementary School nga pulos nakasinati og cracks ingon man ang Kamputhaw Elementary ug Apas Elementary School. Nunot niini miumol og tulo ka team si Cebu City DepEd Supt. Ria Mar Angtod nga maoy gitahasan pagsusi sa mga school buildings dinhi sa dakbayan. - BANAT NEWS