Gatosan ang nangatulog sa mga plaza sa Negros Occidental

BACOLOD CITY, Philippines — Gatosang mga residente nga sagad gikan sa habagatang bahin sa Negros Occidental ang nangatulog sa mga plaza sa Negros tungod sa 6.9 magnitude nga linog nga miigo niadtong Lunes nga ang sentro diha mahitabo sa kadagatan sa lungsod sa Tayasan sa Negros Oriental nga duol ra sa habagatang bahin sa Negros Occidental.

Si Provincial Social Welfare Officer Liane Garcia, sa gisumitir niining report kang Governor Alfredo Maranon Jr. kagahapon adunay gatosang mga residente ang nangatulog sa mga plaza sa Sipalay City, Kabankalan City, Himamaylan City, ug mga lungsod sa Hinoba-an, Hinigaran, Pontevedra, Binalbagan, ug Isabela.

Sa amihanang bahin sa Negros Occidental, diha usab nangatulog sa gawas ang mga residente sa Calatrava, San Carlos ug Sagay City. Ang nagkadaiyang mga lokal nga kagamhanan sa nahisgutang mga lugar mimuntar og “community kitchen” diin gihikay ang mga pagkaon sa mga namakwit.

Hinuon kagahapon namalik na sa ilang tagsatagsa ka mga panimalay ang mga namakwit. Samtang nagpadayon ang pag-monitor sa nagkadaiyang lokal nga Disaster Risk Reduction Management Councils sa sitwasyon.

Alas 12:05 sa hapon kagahapon ang Phivolcs naka-rekord og laing aftershock gibanabanang 18 kilometros sa kadagatan sa Tayasan nga may magnitude nga 4.0. nabatyagan kini sa Iloilo City sa gikusgong intensity 2, ug intensity 1 sa Canlaon City, Negros Oriental.

Si Gov. Maranon mipadayag nga mopadala sila og pinansyal nga hinabang sa Negros Oriental human sa pagtuki sa Sanguniang Panlalawigan (SP) karong adlawa. Miapelar ang gobernador sa mga Negrenses nga dili maratol panahon sa katalagman.

Sa Negros Occidental, lakip na sa Bacolod City, San Carlos City, Cadiz City ug Sagay nakasinati og nangliki nga mga edipisyo, mga malls, mga taytayan ug karsada sumala pa ni Vicfran Defante sa Provincial Disaster Management Division Program (PDMDP).  - BANAT NEWS