Molupyo sa Lapulapu gipaalerto

CEBU, Philippines - Gumikan sa false alarm bahin sa tsunami   niadtong Lunes sa hapon ang kagamhanan sa dakbayan sa Lapulapu mipaalerto sa tanang mga molupyo ug sa mga opisyal usab sa kagamhanan  sa dakbayan.

Si Lapulapu City Mayor Paz Radaza nakigtagbo    sa mga sakop sa disaster risk management council kagahapon sa buntag ug gimandoan kini sa pagkamabinantayon sa pagtuman sa ilang katungdanan.

Alang sa mayor nga ang unang maniid pag-ayo sa kahimtang sa palibot kun mga balita nga makapakurat sa katawhan way lain kun dili ang mga grupo sa risk reduction management council.

Ang maong pundok uban sa mga otoridad sa kapolisan ug militar mao ang mopakalma  pag-ayo sa katawhan aron malikayan ang dagkong kadaot sa kinabuhi sama sa stampede.  

Matud pa ni Mayor Radaza nga dili maayo nga unang mahadlok ang mga sakop sa maong grupo kay dili na sila makahatag og maayong giya sa katawhan nga ilang gialagaran.

Miingon ang mayor nga mas maayo usab nga   andam kanunay ang mga molupyo sa maong dakbayan   kung adunay moabot nga kalamidad sama sa dakong baha o kaha tsunami nga posibleng moigo sa dakbayan.

Sa pakigtagbo ni Radaza sa grupo nga gitahasan sa pagbantay sa kaluwasan sa katawhan sa panahon sa katalagman, mitambong usab ang mga sakop sa Phivolcs.

Didto gipasabot sa mga opisyal sa bulkan nga ang tsunami kalagmitan gyung mahitabo liwas sa kusog nga linog,  apan dili hinuon tanang linog segundahan og tsunami.

Apan miawhag kini sa taga Lapulapu nga bisan patag kaayo ang Lapulapu ug walay tag-as nga bungtod, di gihapon kuyaw sa tsunami kay ang mga isla dinhi sa Sugbo kuli kaayong abton og tsunami.

Gumikan niini gimanduan ni Radaza ang mga sakop sa City Disaster Risk Reduction Management Council sa dakbayan sa Lapulapu nga mohimo og subsob nga pagbansaybansay ug mopahimangno sa matag barangay nga mangandam sa tanang panahon  bisan halayo ra ang posibilidad nga atakehon sa tsunami ang maong dapit.

Hinuon matud pa ni Radaza nga bisan sa kakusog sa linog niadtong Lunes, ang edipisyo lamang sa elementarya ug high school sa Barangay Maribago ang nahiagum og kadaot pinaagi sa pagpangliki sa mga bongbong niini.  - BANAT NEWS