Pasangil ni Sesbreño gipanghimakak sa polis

CEBU, Philippines - Gipanghimakak sa kapolisan sa Talisay ang pasangil nga wala sila mohatag og seguridad sa pamilya ni manlalaban Raul Sesbreño hinungdan nga nangamatay kini dihang gibanhigan niadtong miaging Miyerkules sa hapon.

Mao kini ang gibutyag ni Alex Manabat, radio operator sa Talisay City Police Office sa Banat News kagahapon kinsa nagkanayon nga nagpabiling talandugon ang kahimtang sa demolition site sa pagkakaron.

Ang pamahayag ni Manabat maoy iyang reaction sa bahad ni Sesbreño nga mopasaka og kaso batok sa kapolisan sa Talisay gumikan sa kapakyas niini sa   pagbantay sa iyang pamilya human sa demolition niadtong Miyerkules sa hapon

Matud pa ni Sesbreño nga kun gibantayan pa sa kapolisan ang iyang asawa sa maong higayon dili unta madisgrasya ang kinabuhi niini uban sa iyang mga kauban.

Mahinumdoman nga sa maong higayon misakay ang iyang asawa nga si Virginia Sesbreño, uban ni Soledad Epanto, nga ilang piyado sa yuta sa sakyanan sa ilang higala nga si Joshua Young kinsa maoy nagmaneho sa kaugalingon niyang sakyanan dihang pag-abot sa eskina sa dalan Rabaya habig sa SRP, gibanhigan silang tulo ug namatay. Apan si Manabat sa iyang bahin nagkanayon nga ang kapolisan mituman sa orden sa korte sa pagpabantay sa lugar o hurisdiksyon diin gipahigayon ang demolition.

 Matud pa niya nga walay   mando ang korte sa kapolisan nga ilakip sa ilang pagbantay ang pamilyang Sesbreño human sa demolition.

Maoy hinungdan , matud pa niya nga   human sila makapangayo og clearance gikan sa sheriff nga gidestino sa korte sa pagpatuman sa demolition dihadiha namiya ang mga polis   sa lugar kay may gitubag usab silang alarma sa kagubot sa laing lugar sa dakbayan sa maong higayon.

Si Manabat  midugang nga sulod sa nagsunod nga duha ka adlaw nga demolition, gidestinohan og tag- kapin 20 ka polis nga nagbantay didto sa demolition site.

Kadtong adlaw nga gibanhigan ang asawa ni Sesbreño ug laing duha, maoy ikaduhang adlaw sa pagpangguba sa kabalayan sa yuta ni Sesbreño. Gani kagahapon nga mao untay ikatulong higayon, mikabat unta og 30 kapin ka polis ang gipadala ngadto sa demolition site apan wala man motungha ang sheriff, hinungdan nga wala mahinayon ang demolition .

Sa samang higayon gipahayag ni Manabat nga gikulbaan gihapon sila nga may mahitabo pang kagubot tungod kay daghang mga tag-iya sa mga balay nga nasuko nga gipaguba ang ilang mga pinuy-anan. Sa laing bahin gibutyag ni Manabat nga padayon pang gipanid-an karon sa kapolisan ang mipatay sa .asawa ni Sesbreño ug sa laing duha ka kauban niini. Kini samtang wala motalaw si Sesbreño sa pagpadayon paghawan sa mga panimalay nga gipanarok sa sulod sa iyang yuta bisan nakalas na ang kinabuhi sa iyang asawa. (BANATNEWS)