May deperensya sa pangisip gilugos

CEBU, Philippines - Usa ka 20-anyos nga babaye nga giingong adunay deperensya sa pangisip ang giamong-amongan sa usa ka mag-uuma sa barangay San Antonio lungsod sa Boljoon.

Ang biktima nagpangidaron og 20-anyos ug molupyo sa maong lugar samtang ang suspetsado nailhan sa ngalan nga Lydio Antiporta, molupyo sa sitio Gin-alad sa nahisgutang barangay.

Sa pamahayag sa biktima sa kasong gipasaka batok sa suspek kini mibutyag nga nangguna kini sa ilang baul sa maong lugar dihang giduol kini sa suspek ug gihagad kini nga mangadto sila sa kasagingan kay maghilawas silang duha.

Apan ang biktima nagdumili pinaagi sa pagtubag nga “di ko uy.” Apan giilog sa suspek ang guna sa biktima ug giguroy kini ngadto sa kasagingan ug didto gilugos siya.

Human siya lugosa ug bisan nagping-it pa siya sa kasakit giagni siya sa suspek nga mamauli sa pag-ingon: “ tana pauli nata, ayaw saba ha,” tipik sa affidavit sa biktima.

Apan wala kini malilong sa magbalantay sa biktima ug dihang gipangutana ang naulahi gibutyag niini ang tanang gibuhat kaniya sa suspek hinungdan sa pagdakop kang Antiporta.

Sa laing bahin, nagtingkagol usab ang usa ka lalaki nga hubog human kini nanghinol sa pribadong parte sa kalawasan sa usa ka babaye niadtong alas 9 sa miaging gabii sa barangay South Poblacion lungsod sa San Fernando.

Ang biktima nagpangidaron og 25-anyos samtang ang suspetsado nailhan usab sa ngalan nga Tabino Quiachon, 42, usa ka construction worker.

Sa pakighinabi sa Banat News ni PO1 Cleofas Cabrera sa San Fernando Police Station mibutyag kini nga ang suspetsado kalit misulod sa panimalay sa biktima ug gihinol ang pribadong parte sa lawas sa babaye. Hinungdan nga nangayo og tabang ang biktima ug nasikop ang suspek ug gibalhog sa karsel sa kapolisan.  - BANAT NEWS