Karaang merkado publiko gihawanan

CEBU, Philippines - Hingpit nga gipapha sa kagamhanan sa dakbayan sa Mandaue ang mga sidewalk vendor sa karaang merkado publiko sa sitio Asinan sa barangay Mantuyong, ingon man sa barangay Centro ug sa palibot niini.

Ang paghawan sa maong lugar may labot sa pagpangandam sa programa nga ipatuman sa lokal nga kagamhanan nga gitawag nga “My Mandaue program” .

Ang tuyo niini mao ang pagpatahom sa maong lugar aron mainila ang kultura ug makasaysayanong dapit sa dakbayan.

Ang maong programa nga gitakdang ipatuman karong sunod semana mipili sa duha ka barangay sa siyudad nga pilot area sa maong programa.

Si Manlalaban Jamaal Calipayan nga maoy executive secretary sa maong programa miingon nga gitinguha nila nga ang dakbayan sa Mandaue mahimong sentro sa patigayon dinhi sa nasud nga Pilipinhon.

Gusto  sa kagamhanan sa dakbayan   nga matuman na sa hingpit ang maong programa sulod niining tuiga pinaagi sa paggahin og P20 milyones nga igasto sa tanang panginahanglan niini.

Gumikan niini si Mayor Jonas Cortes mimando na   sa mga sakop sa demolition team sa dakbayan sa pagguba sa mga illegal nga estraktura sa maong lugar. 

Gipalimpyohan ang palibot niini pinaagi sa pagtangtang sa mga sipra sa mga bongbong ug mga koral ug ang pag-ayo sa mga kanal niini.

Sa pagsiguro sa kahinlo sa maong dapit, gisikop sa demolition team sa miaging adlaw ang mga molupyo nga wala mohatag og pagtagad sa mando sa mayor.

Matag usa kanila gipamulta og tag P500 ug gisakmit pa ang ilang mga baligya.

Gumikan sa maong   lakang, nalipay kaayo ang mga manindahay sa bag-ong merkado publiko nga nahimutang sa sitio Tribunal, barangay Centro   tungod kay wala nay makasabud sa mga customer nga buot mamalit sa bag-ong merkado sa dakbayan.

Nasayran nga gumikan sa pagpabilin sa ubang mga vendor didto sa karaang merkado, dyutay nalang ang tawo nga molahos ngadto sa bag-ong merkado kay adto man masabod sa mga baligya sa mga vendor nga wala mobalhin sa bag-ong merkado sa dakbayan. (BANATNEWS)