CEBU, Philippines - Hingpit na gyud nga napabuto kagahapon ang 29 ka vintage bombs didto sa Carmen Copper Corporation sa Toledo City nga nakuykuyan sa South Road Properties sa Cebu City niadtong milabay’ng semana.
Alas-4 pasado sa kaadlawon gihatud sa nag-convoy nga mga trak inubanan sa mga sakop sa Special Weapons and Tactics (SWAT), Central Command, Cebu City Police Office, mga staff sa buhatan ni Mayor Michael Rama, Bureau of Fire Protection ug Cebu City Risk Reduction Management Council (CCRMC).
Ang unit sa Armed Forces of the Philippines nga Explosive Ordnance Disposal (EOD) maoy nag-set up sa C4 explosives nga miabot ngadto sa kapin sa upat ka oras. Ang vintage bombs ug ang 1000 pounds nga laing bombang nakubkoban usab diha sa IT Park, sa barangay Apas niadtong 2010 gipabuto gahapon alas 12:45 sa hapon uban sa tulo ka kusog nga sagunson nga pagbuto.
Ang Visayas Commander sa EOD nga si Carlito Lachica nagkanayon nga nagdala sila kagahapon og 125 explosives apan 80 lang ang nagamit niini sanglit nahaom ra kini sa 29 ka bomba.
Sumala pa ni Lachica nga ilahang ibalik sa ulohan nilang buhatan ang sobra nga C4 explosives aron magamit kini sa higayon nga manginahanglan pag-usab niini ang ubang local government unit.
Samtang si Lt. Gen. Ralph Villanueva sa Central Command misugyot nga ipaubos sa survey ang Kawit Island sa SRP aron maklaro kung duna pay nahibiling bomba sa maong dapit. (BANATNEWS)