CEBU, Philippines - Tulo ang samaran sa nahitabong ‘drive-by shootings’ sulod sa singko minutos sa managlahi nga lugar sa dakbayan sa Sugbu kagahapong adlawa.
Ang mga biktima mao ang duha ka minor nga nag-edad og 17-anyos ug usa ka Jun Roque Amaya, 24, pulos molupyo sa barangay Guadalupe ug usa ka 16-anyos nga molupyo sa barangay Labangon.
Alas 3:20 sa kaadlawon nahitabo ang pagpamusil sa dalan V. Rama ug Englis barangay Guadalupe dihang ang grupo sa 17-anyos nag-inom sa usa ka tindahan dihang kalit nga gihunongan sa usa ka awto ug girakrakan sa sakay niini.
Ang 17-anyos naigo sa paa samtang si Amaya naigo sa paa ug sa hawak ug gidala sa Cebu City Medical Center. Ang mga mamumuno misutoy padulong sa Happy Valley .
Lima ka minutos ang milabay laing pagpamusil ang nahitabo sa dalan Katipunan barangay Labangon diin usa ka 16-anyos nga nakig-inom sa mga barkada ang gipusil gihapon sa nag-awto nga mga mamumuno.
Naigo sa walang abaga ug dughan ang 16-anyos ug gidala sa CCMC.
Nakuha sa crime scene mao ang upat ka kabhang sa kalibre .9mm nga gituohang maoy gigamit sa pagpamusil.
Sa pakighinabi sa Banat News ni PO3 Ruth Violanggo sa Cebu City Police Office Homicide Section, mibutyag kini nga daghan sila nga gisubay karun nga mga anggulo.
Lakip na niini ang ‘tripping’ sa mga mamumuno. Matud pa ni Violanggo base sa ilang nakuhang impormasyon nga ang sakyanan nga gigamit sa pagpamusil sa duha ka lugar susama lang og diskripsyon nga abuhon ang kolor nga usa ka sedan nga awto.
Apan ang mga gunman lahi-lahi og gisuot nga sapot nga gihulagway sa mga testigos nga daw adunahan og pamayhon ang mga gunmen. (EIM) (BANATNEWS)