CEBU, Philippines - Nagpakitabang sa korte si Sheriff Eugenio Fuentes nga mopagawas og order nga magmando sa Philippine Veterans Bank nga mopagawas og desisyon bahin sa utang nga nagkantidad og P13.3 milyones ngadto ni Maurillo Rallos.
Kini human ang bangko nga maoy nagkupot sa pundo sa kagamhanan sa syudad sa Sugbo nagdumili sa pagtuman sa mando.
Matud pa ni Fuentes nga mipagawas siya og notice of garnishment ngadto na sa bangko aron mapagawas ang depositong kwarta sa kagamhanan sa Sugbo apan matud pa niini nga ang maong kuwarta gigahin na alang sa laing mga proyekto sa kagamhanan sa dakbayan.
Dugang pa ni Fuentes nga sa iyang addendum iyang gipasabot nga kining tanan pangatarungan lang sa mga opisyal sa kagamhanan nga walay basehanan tungod kay napakyas sila sa pagpakita og ebidensya sa pagmatuod niini.
Matud pa ni Fuentes nga makadaghan nang higayon nga mihimo siya og follow-up ngadto sa bangko aron mahatud na ang kantidad apan napakyas ang bangko sa pagtuman niini.
Hinungdan nga si Fuentes nakadesider nga mangayo nalang og tabang ngadto sa korte.
Samtang si RTC-Branch 9 Judge James Stewart Ramon Himalaloan mibasura sa gisang-at nga motion for reconsideration sa kagamhanan sa Sugbo alang sa ilang dinaliang motion sa pagsalikway sa writ of execution ug sa notice of garnishment tungod sa kakuwang og merito sa maong motion. WC - (BANAT NEWS)