Juan Luna Ave, gihimong Pope John Paul II Ave.

CEBU, Philippines - Giaprobahan na sa konseho sa siyudad sa Sugbo ang ordinansa nga mag-usab sa ngalan sa Juan Luna Avenue ngadto na sa “Pope John Paul II Avenue” sa Barangay Mabolo.

Human sa pipila ka buwan nga deliberasyon, ang tanang konsehal sa Siyudad miuyon niini gumikan sa ilang pagtamod sa inila nga leader sa Simbahang Katoliko.

Si Konsehal Edgardo Labella kinsa maoy nangamahan sa ordinansa misaysay nga dako kaayo og natampo ang kanhi Santo Papa sa paghiusa sa nagkadaiyang leader sa kalibotan.

Dili usab makalimtam sa mga Sugbuanon ang pagduaw sa Santo Papa sa Siyudad sa Sugbo niadtong 1981.

Ang Juan Luna gitawag usab kaniadto og San Jose dela Montaña Street apan nakahukom ang mga konsehal nga usbon gumikan kay adunay history ang Santo Papa sa maong dapit.

Mitambong sa final deliberation sa miaging adlaw ang pipila ka tinun-an sa Seminario Mayor de San Carlos ug si Father Dan delos Angeles nga usa usab ka propesor.

Nagkanayon si delos Angeles nga nalipay siya pag-ayo sa desisyon sa konseho ug natayming usab kini sa nagkaduol na nga canonization ni Beato Pedro Calungsod.

Sumala pa niya nga dako kaayo og natampo ang Santo Papa niini sanglit mao kini ang nangulo sa seremonya kaniadto nga mahimong beato si Calungsod.  WC   - (BANAT NEWS)