Warning sa gobernador dako'g epekto

CEBU, Philippines - Epektibo ang giluwatang pasidaan ni Governor Gwendolyn Garcia batok sa mga negosyante sa lungsod sa Compostela nga nagpataka lang og parking sa ilang mga container van ug dagkong mga trak de karga sa daplin sa karsada sa maong lungsod.    

Kini base sa mga pamahayag sa mga kapitan sa barangay nga nahimutangan sa mga negosyante kinsa nagkanayon nga sa pagkakaron gitarong na pagparking ang ilang mga sakyanan sulod sa yuta sa maong mga negosyante.

Wala hinuon ibutyag ni konsehal Joven Amor, ang ABC President sa lungsod sa Compostela, ang mga ngalan sa maong mga negosyante, apan mibutyag kini nga misaler ang pasidaan nga giluwatan sa gobernador atubangan sa media bahin sa maong isyu.

Sayo niini giawhag sa gobernador ang mga negosyante nga nanag-iya og mga trak de karga nga dili himoong parkinganan ang daplin sa karsada.

Ang maong problema   dugay nang gireklamo sa mga kapitan sa lungsod kay usa kini nga nakahasol sa mga motorista sa maong mga   dapit sa lalawigan kay mao kini ang kanunay nga gamot sa paghuot sa mga sakyanan sa kadalanan.

Matud pa ni Amor nga gumikan sa maong pasidaan sa gobernador naleksyon ang mga   negosyante sa ilang lungsod nga nakapausab sa kinaiya niini.

Gitataw niya nga dugay nang gibadlong sa mga kapitan sa barangay ang mga negosyante sa ilang lungsod nga nagpakita og abuso, apan wala gyud kini patuo.

Apan dihang nabati niini ang pasidaan sa gobernador dali kaayo kining mituman sa maong awhag sa gobernador, busa ang mga kapitan sa barangay nga naproblema sa maong mga negosyante   mapasalamaton kaayo sila sa dinaliang aksyon sa gobernador pagsulbad sa maong problema.  WC - (BANAT NEWS)