CEBU, Philippines - Gipasalig ni Kalihim Jesse Robredo sa Department of Interior and Local Government (DILG) nga molingkod na ang tinuod nga mayor ug mga konsehal sa lungsod sa Compostela karong Pebrero, 15, 2012.
Busa milaom niini ang katawhan sa maong lungsod kay mao kini ang ilang gipaabot, sumala ni ABC president Joven Amor, konsehal sa maong lungsod.
Matud pa ni Amor nga dako ang ilang pagtuo nga tumanon ni Secretary Robredo ang iyang saad nga sa Pebrero 15, makapanaog na ang iyang buhatan og desisyon kun si kinsa ang makalingkod nga mga opisyal sa lungsod sa Compostela.
Si Amor miingon nga dako kaayo ang kadaut sa ilang lungsod kun magpadayon nga walay maglingkod isip mayor ug mga konsehal sa lungsod kay dili gyud moirog ang kalambuan sa ilang lugar.
Iyang gitataw nga lahi ra gyud ang pagdumala sa munisipyo kun ang maglingkod isip mayor mao lamang ang Officer-In-Charge ug director sa DILG-7 sanglit limitado ang gahum niini.
Dugang pa niini, nga una silang nagpakitabang kang Governor Gwendolyn Garcia ug mga opisyales sa lalawigan sa Sugbo nga madali na unta ang election protest sa kanhi mayor sa lungsod Ritchie Wagas ug maoy hinungdan nga mitabang kanila ang kalihim sa DILG. (WC) - (BANAT NEWS)