C4 explosive andam na

CEBU, Philippines - Madayon na gyud ang pagpabuto sa nahabiling mga bomba nga miabot na karun og dul-an 30 human miabot na ang gikinahanglan nga C4 explosives sa Armed Forces of the Philippines (AFP) Central Command. Kini ang gipahibawo ni Lt. Col. Christopher Tampus.

Si Tampus, tigpamaba sa Central Command nagkanayon nga ang 125 ka C4 explosives nga nagkantidad og P1.7 million naabot na sa miaging hapon diha sa 7th Forwarding Army Service Support Unit.

Ang suwat nga gipadala sa Cebu City Hall ngadto sa ilang buhatan nga nag-request sa explosives natigayon pinaagi sa paningkamot ni Lt. Gen. Ralph Villanueva, ang pangu sa central command.

Matud ni Tampus nga si Villanueva miadto sa Kawit Island sa South Road Property (SRP) niadtong Huwebes sa buntag ug miingon nga kinahanglan ang mga bomba mapabuto sa daling panahon tungod sa picric acid nga gikan sa ubang bomba nga nagkatag sa yuta.

“May nakikita na naman kasi’ng bombs na may leak at nagkalat na ang picric acid,” matud pa niini.

Si Villanueva mirekomendar usab nga kun ang maong lugar himuong recreation area kinahanglang susihon og maayo ang lugar kun wala na bay bomba sa ilawom pinaagi sa paggamit og metal detector aron walay madisgrasya.

Iapil usab sa Centcom ang pagpabuto sa 1000 pounds ug ang 40-feet vintage bomb nga nakubkoban usab diha sa IT Park, Barangay Lahug sa niaging tuig.

Niadtong milabay’ng gabii laing mga vintage bombs usab ang nakit-an sa barangay Hipodromo ning dakbayan ug gihipos na sa mga sakop sa Special Weapons and Tactics. -  Sanden Anadia/EIM  - (BANAT NEWS)