Gi-ambush patay

CEBU, Philippines - Natagak sa motorsiklo ug patay nang nadangat sa tambalanan ang 30- anyos nga lalaki human kini gi-ambusan ug gipusil sa ulo samtang nagmaneho sa iyang motorsiklo angkas ang iyang igsuong babaye diha sa sitio Pangpang Acob barangay Valencia siyudad sa Carcar niadtong Huwebes sa alas 5:45 sa hapon.

Ang biktima mao si Frederick Pansit, 30, ug taga sitio Danao barangay Valencia samtang luwas hinuon ang angkas niyang igsuong babaye nga si Gladys Mae Pansit, 44.

Samtang duha ka mga lalaking pulos nagsul-ob og helmet ang responsable sa pagpamanhig.

Matud ni PO1 Ed Clint Maranan, desk officer sa Carcar City Police dihang nahinabi sa Banat News subay sa imbestigasyon paingon na ang magsuon pauli sa ilaha dihang gisundan sila sa mga mamumuno.

Pag-abot sa maong lugar kalit lang misikit kanila ang mga mamumuno ug ang angkas midiretso og pusil sa biktima diha sa luyong bahin sa ulo hinungdan sa pagkasarasay sa motorsiklo.

Ang igsuon sa biktima misinggit pagpangayo og tabang hinungdan nga misutoy og padagan ang mga mamumuno palayo sa lugar.

Daling gihatud sa Carcar City District Hospital ang biktima apan pag-abot didto gideklarar ni Dr . Silde Benoya nga patay na.

Ang kapulisan padayon pang nanghipos og kasayuran sa mga kabanay sa biktima ug sa nakasaksi sa hitabo aron mahibaw-an kun duna ba kini atraso nga maoy posibleng hinungdan sa hitabo.  EIM - (BANAT NEWS)