2 tulisan nga mitulis sa Indian nadakpan

CEBU, Philippines - Gitulis sa tulo ka mga lalaki ug gikuha ang P28 mil nga halin sa negosyanteng Indian diha sa barangay Malingin lungsod sa Daanbantayan niadtong Miyerkules sa alas 11:30 sa buntag.

Ang biktima mao si Sanjeev Cumar, 29 , nga temporaryong nagpuyo sa barangay Cantecson sa siyudad sa Bogo ug negosyante og mga habol ug panapton nga pautang.

Gidemalas hinuon ang duha sa tulo ka tulisan nga sila si Ruben Cabagti, 23, ug Joel Gelido, 33, pulos molupyo sa barangay Sangat lungsod sa San Fernando samtang gipangita pa ang ikatulo nilang kauban nga nakaeskapo.

Matud ni PO1 Cleo Bohol, ang desk officer sa Daanbantayan Police Station dihang nahinabi sa Banat News nagsakay og motor ang biktima dihang gibabagan sa mga suspek nga sakay usab og motorsiklo.

Diretsong gitionan sa mga tulisan og armas ang biktima dayong deklarar og tulis samtang ang usa nikuot sa pitaka sa biktima dayong diretso og ikyas luwan sa motorsiklo.

Sa gihimong hot pursuit operation pinangulohan sa hepe nga si Insp. Roberto Hugo nasikop nila si Cabagti ug Gelido apan nakaipsot ang ikatulong tulisan. Na-recover sab sa kapulisan ang motorsiklo nga gisakyan sa mga suspek nga for registration ang plaka. (BANATNEWS)