Assistant Visayas Ombudsman ipa-inhibit

CEBU, Philippines - Buot ni Cong. Arturo Radaza nga mo-inhibit si Visayas Assistant Deputy Ombudsman Virginia Palangca Santiago sa pagdungog sa iyang mga kaso nga giatubang diha sa Sandiganbayan.

Sa giluwatang pamahayag ni Radaza atol sa usa ka press conference kagahapon sa hapon sa Lapulapu City hall conference room kini mipasangil nga ‘bias’ si Santiago pagtratar sa iyang kaso.

Si Radaza nag-atubang og kaso kalabot sa mga gipamalit nga computers sa siyudad nga gipasaka ni Efrain Pelaez ngadto sa Ombudsman ug ingon man sa kontrobersyal nga lamppost nga padayong gihusay sa Sandiganbayan.

Gitun-an na karon sa mga abogado ni Radaza ang pagduso og "Petition for inhibition" batok ni Santiago kung mahibalik ngadto kanila ang pagresulbar sa maong kaso.

Samtang gikalipay ni Radaza ang pagbasura sa Comelec en banc sa iyang kaso nga gipasaka sa iyang kaatbang sa politika sa pagka -kongresista nga si kanhi interior undersecretary Joselito Ruiz nga miakusar kaniya og vote buying sa nakalabay’ng 2010 elections.

Sa pagkakaron ang kaso nalang sa lamppost ug ang pasangil nga pagpaburot sa presyo sa computers nga gihatag ngadto sa isla sa Olango ang nagpabiling atubangon ni Radaza nga gialuman niyang mabasura ra usab. (BANATNEWS)