CEBU, Philippines - Dako ang pagtuo ni Atty. Raul Sesbreño nga may kalambigitan sa pag-ambush sa iyang kapikas ug mga sakop ang mga supak sa demolisyon diha sa barangay Lawaan sa dakbayan sa Talisay.
Kini maoy pamahayag ni Sesbreño kagahapon sa interbyu sa TV Patrol Central Visayas apan wala siya mohingalan kanila gawas lang sa paghatag og timailhan nga sila mao kadtong nangulo sa pagbabag sa demolisyon.
Gibutyag sa abogado nga nakadawat sila og mga notisya sa pagpanghulga nga duna nay patong nga P100,000 ang iyang ulo aron lang dili mahinayon ang demolisyon sa Lawaan II ug III.
Matud ni Sesbreño nga duna siya’y mga tawong gidudahan nga mibayad sa gun-for hire apan samtang wala pa niya kini mapasakai og kaso dili una niya sila panganlan.
Dako ang iyang pagdudang ang mga mibabag sa demolisyon maoy mastermind sa pagpamanhig.
Samtang sila si Nestor Zapanta, residente sa barangay Lawaan II ug Ranulfo Daligdig kinsa nanag-iya og mga edipisyo diha sa nahisgutang dapit mibutyag sa mga tigbalita kagahapon nga wala sila’y kalambigitan sa nahitabo. Kahinumduman nga ang asawa ni Sesbreño nga si Virginia Sesbreño, sinagop nga si Joshua Young ug Soledad Epante, caretaker sa ilang pamilya ang nangamatay sa pagpamanhig niadtong Miyerkules sa hapon diha sa eskina dalan Rabaya, barangay Cansojong, dakbayan sa Talisay. Ang kapolisan mitutok karon sa motibong posibleng may kalambigitan pagpa-demolish ni Sesbreño sa mga panimalay ug mga tindahang gitukod sa luna nga iyang giangkon sa maong barangay.
Silang Zapanta ug Daligdig nga usa sa mga kusganong mibabag sa demolisyon mipasabot nga kung mosukol man sila kang Sesbreño adto nila kini buhaton sa korte ug dili sa dautang paagi.
Si Zapanta ug Daligdig nagkanayon nga mopasaka sila og kaso batok sa sheriff tungod kay base sa court order sa writ of demolition nga giluwatan ni Regional Trial Court (RTC) Judge Gilbert Moises sa Branch 18 ang mga edipisyo diha sa Lot 1 nga nahimutang sa Lawaan III maoy ipa-demolish apan giapil sa gi-demolish ang kabalayan sa Lawaan II.
Si Supt. Eddie Recamara, hepe sa Talisay City Police Station sa pakighinabi niini sa Banat News nagkanayon nga duna na sila’y cartographic sketch sa mga namanhig apan dili pa una nila kini ipagawas. (/EIM) (BANATNEWS)