Tigpamaba sa City Hall andam moatubang sa konseho

CEBU, Philippines - Gibutyag kagahapon sa public information officer sa siyudad sa Sugbo nga si Carlo Dugaduga nga andam siya moatubang sa konseho sunod semana aron mohatag og katin-awan kabahin sa pasangil nga gihimong ‘propaganda machinery’ sa mayor ang iyang buhatan.

Gihimakak ni Dugaduga ang obserbasyon ni Konsehal Alvin Dizon ang maong pagduda ug giklaro niyang patas ang newsletter sa City Hall nga Bayanihan Advocates Rallying for Unity and Good Governance (BARUGG).

Matud pa niya nga dili tinuod ang gipadayag ni Dizon nga pulos kabahin ra kang Rama ang mga unod sa maong basahon tungod kay adunay mga seksyon niining nagtuki sad sa legislative department.

Dugang pa niya nga mag-agad ra siya sa desisyon ni Rama kung motambong ba siya o dili sa imbitasyon sa konseho sunod semana.

Gibalita sa Banat News kagahapon kalabot sa pagpatawag sa konseho ngadto kang Dugaduga aron paesplikaron kini kung unsa gyud ang nag-unang trabaho sa iyang buhatan.

Gidepensahan usab ni Dugaduga ang gipasiugdahan niya nga press briefing alang sa mga department heads. Kahinumduman nga wala mahimuot si Bise Mayor Joy Augustus Young sa mga gipanghimo nga press briefings gumikan kay nagtuki kini sa mga reklamo sa mga department heads kalabot sa paglaslas sa ilang budget.

Apan depensa pa ni Dugaduga nga ang pagtuki sa mga department heads kalabot sa nagkuwang nila nga budget nagpasabot lang nga nagpakita kini og klaro ug walay gitagotago sa ilang mga pagpanarbaho. (BANATNEWS)