Traysikol, karumata di paagion sa CSCR

CEBU, Philippines - Higpitan na sa dakbayan sa Talisay ang pagdili sa tanang matang sa mga sakyanan nga hinay modagan sa pagsubay sa Cebu South Coastal Road ilabi na panahon sa kagabhion tungod sa gidala nilang peligro ngadto sa mga motorista.

Kini mao ang mga traysikad, bisekleta lakip na ang mga karumata ang gidid-an pagsubay sa nahisgutang karsada paglikay sa disgrasya tungod kay kasagarang moagi diha nga mga sakyanan kusog ang padagan.

Lakip sa gidili sa maong dalan ang pag-parking lakip na ang pagbuwad og mga kahoy ug uban pang makahatag og kahasol sa panan-aw sa mga motorista aron malikayan ang disgrasya.

Apan karon maobserbahan nga dunay mga traysikad nga magkarga og pasahero nga magbiyahe diha sa CSCR habig sa dakbayan sa Talisay.

Tungod sa maong padayong paglabaylabay niining mga hinay nga mga matang sa transportasyon sa CSCR pipila ka mga motorista na ang nagbagulbol tungod kay posible nila silang mabanggaan ug maamong usab sila.

Si Bise Mayor Alan Bucao, chairman sa City of Talisay-Traffic Operation Development Authority (CT-TODA) sa pakighinabi sa Banat News kagahapon nagkanayon nga bag-ohay lang mipahigayon og information caravan sa barangay Dumlog, Pook, San Roque ug San Isidro nga duol sa CSCR bahin niini.

Matud ni Bucao nga kuwang og mga traffic enforcers ang CT-TODA maong kinahanglan nila og tabang sa kabarangayan aron makontrolar ang gidaghanon sa mga traysikad ug mapahimangnoan ang mga operator ug mga drayber nga gidili ang pagsulod sa mga national highway o ngadto sa dagkong mga karsada.

Karong Pebrero 7, 2012 mopasar og resolusyon nga mangayo og budget kang Mayor Socrates Fernandez si Bucao alang sa himuong seminar ug orientation sa mga drayber sa traysikad bahin sa mga lagda sa trapiko (BANAT NEWS)