Walo ka polis giimbestigar

CEBU, Philippines - Walo ka mga polis sa lungsod sa Madridejos ang nag-atubang og imbestigasyon kabahin sa kamatayon sa ilang dinakpan niadtong milabay’ng Domingo sa kaadlawon nga namatay diha na sa Bantayan District Hospital nianang pagka-adlaw’ng Lunes.

Gibutyag ni Sr. Insp. Jaime Santillan, hepe sa Madredijos Police dihang nahinabi sa Banat News ang walo ka mga polis gipatawag na niya sa opisina niadtong miaging hapon uban sa igsuon sa biktimang si Redentor Iscalicas, 28 anyos nga si Rashel ug gituki ang maong reklamo. Matud ni Santillan way bisan usa niya ka sakop nga miangkon sa maong pasangil nga pagpamun-og ug wala usab makatumbok si Rashel kun si kinsa sa iyang mga sakop ang nanapat sa igsuon niini.

Ang walo ka mga polis nga nag-atubang karun og imbestigasyon mao ang lima ka mga polis nga gipabantay sa gipahigayong bayle sa sitio Chinese sa barangay Poblacion diin gisikop si Iscalicas.

Gidakop si Iscalicas tungod sa giingong paghapak niini sa patrolcar sa mga polis ug gibilanggo tungod sa kahubog.

Ang gipatawag ug posibleng imbestigahon bahin sa kaso mao sila si PO3 Fabio Daplinan, PO2 Rico Reboquio, PO2 Joel Pino, PO2 Mamirod Carasina ug PO1 Michael Porosuelo nga maoy nagbantay sa baylihan.

Samtang ang laing tulo ka mga polis nga giapil sa imbestigasyon mao ang nag-duty sa police station niadtong tungura nga sila si SPO2 Saul Alejandria, PO2 Julius Cesar Searez ug SPO1 Rizalino Batindaan Jr.. Si Mayor Salvador dela Fuente sa interbyu sa DyDD mimando og dinaliang imbestigasyon sa maong hitabo sanglit dili siya buot nga dunay badlungon ug duna say mga abusado sa ilang lungsod.

Si Iscalicas namatay sa Bantayan District Hospital alas 11:40 sa buntag niadtong Lunes tungod sa gituohang ‘acute abdominal problem’ nga nagkinahanglan og dinaliang operasyon.

Ang biktima gibuhian sa mga polis human gibilanggo alas 2:45 sa kaadlawon niadtong Domingo. Apan ang igsuon sa biktima nga si Rashel mipasangil nga naputos og bun-og ug nagmulo sa kasakit sa tiyan ang iyang igsuon dihang naabot sa ilang balay ug mihangyong magpahatud kini sa tambalanan. Ang biktima mibutyag nga gikulata siya sa mga polis. Ang hepe sa kapulisan sa probinsya sa Sugbu nga si Sr. Supt. Patrocinio Comendador mibahad nga dili niya pasayluon ang pulis nga mikulata sa biktima sa higayon nga mapamatud-ang sad-an sa resulta sa imbestigasyon.

Si Comendador nga nahinabi sa Banat News nagkanayon nga base sa gibutyag ni Santillan ang polis nga mikulata sa biktima walay duty niadtong higayona.

“Sigun sa akong nahibaw-an mura’g alarma man gud ni, I don’t know nisukol ba, mao nga gi-aplayan nalang og force sa mga pulis pero subject ni sa investigation. Kun makasala gyud bisan dili siya duty niadtong higayona (pulis), dili nato pasayloon,” pasalig ni Comendador. (BANAT NEWS)