CEBU, Philippines - Patay ang usa ka babaye nga gituohang gitulis ug gipusil sa mga armadong tulisan nga magsakay og motorsiklo sa Sector 3, sa barangay Pagsabungan, dakbayan sa Mandaue alas-9 pasado ang takna sa miaging gabii.
Ang biktima mao si Grace Caminade, 38, nga nagtrabaho sa Peoples Cooperative sa baranggay San Nicolas sa dakbayan sa Sugbo ug nagpuyo sa Sector 2 sa maong barangay.
Si PO2 Heraclio Gamboa sa kapolisan sa Presinto 3 sa Mandaue City Police Office (MCPO) miingon nga gikan pa sa iyang trabaho ang biktima ug padulong na pauli nga nag-inusara dihang nahitabo ang krimen.
Dugang pa niya nga sa imbestigasyon nga ilang gihimo uban sa mga sakop sa Investigation Detection and Management Bureau (IDMB) nasuta nga nahanaw na ang shoulder bag sa biktima.
Nagtuo ang kapolisan nga nagmagahi ang biktima sa paghatag sa bag niini maong kini gipusil ug naigo sa iyang walang bukton nga ang bala milapos sa iyang dughan ug nakaingon sa iyang hinanaling kamatayon.
Gituohang adunay kwarta ug uban pang gamit sama sa cellphone ang bag sa biktima nga nadala sa mga tulisan.
Dugang pa ni Gamboa nga walay molupyo sa maong lugar ang nakasaksi sa krimen tungod sa kangitngit ang dapit nga nahitaboan gawas lang sa buto sa armas nga ilang nadungog ug andar sa usa ka mipabulhot nga motorsiklo.
Nianang pagkakaadlawon usa ka bar tender nga si Laimber Kingson, 21 ang nabiktima sa mga tulisan diha sa barangay Banilad.
Nakuha kaniya ang iyang bag nga gisudlan sa kwartang P3,000, cellphone ug ingon uniporme niini. Walay plaka ang motorsiklong gigamit sa duha ka mga tulisan. (/EIM)(BANAT NEWS)