Kampo ni Rama andam na sa 2013

CEBU, Philippines - “Andam na.” Kini maoy gibutyag kagahapon sa kapitan sa Basak San Nicolas nga si George Rama kalabot sa estado sa grupo sa iyang ig-agaw nga si Mayor Michael Rama sa 2013 eleksyon.

Kini maoy tubag ni Rama sa pag-anunsyo ni Kongresista Tomas Osmeña nga mobalik siya og dagan pagkamayor sa dakbayan sa Sugbu sa 2013 ug dako ang posibilidad nga makaatbang niya si Mayor Rama.

“Hagbay ra nga andam ang among grupo, mensahe lang ko niya (Osmeña), dili siya magsige og panghilabot sa amo grupo, ang iyang grupo maoy atimana,” sumala pa ni Kapitan Rama.

Nagkanayon ang kapitan nga wala siya mabalaka sa pangangkon ni Osmeña nga matud pa nga pabiling lig-on ang Bando Osmeña Pundok Kauswagan (BOPK) kay di na bag-o kanila ang pagpunay og pasiatab ni Osmeña bahin niini.

“Gasige nalang na siya og balik ana, murag kalima na niya gisulti nga modagan siya og balik pagka-mayor. Trabaho una ang angayan huna-hunaon karong panahona,” matud pa sa kapitan ug midugang nga maayo pang hunongon ni Osmeña ang pagpunay niini og pagarpar kalabot sa partido niini. (BANATNEWS)