CEBU, Philippines - Gipasidungan sa Bureau of Customs sa Cebu ang napulo ka mga nag-unang importers ug napulo ka nag-unang exporters nga nakatampo og dako sa ilang target nga koleksiyon sa milabay’ng tuig 2011.
Si Cebu Customs District Collector Atty. Ronnie Silvestre mitunol og pasidungog kanila tungod sa giingong pagbayad nila sa hustong buhis sa adwana sa milabay’ng tuig.
Ang mga importers nga nakadawat og pasidungog gipangunahan sa Seaoil Phils. Inc.; Steel Asia Manufacturing Corp.; Korean Electric Power Corporation (KEPCO)- Salcon Power Corporation (SPC); Petron Corporation; Ad-Ken Trading; Maxima Machineries Inc.; Carmen Copper Corp.; Ajinomoto Phils. Corp.; ug Petronas Energy Phils. Inc..
Sumala pa nga ang maong mga importers nakabayad sa kinatibuk-an og kapin P3 bilyones tungod sa ilang pag-import og mga materyales dinhi sa Sugbu agi sa Port of Cebu ug sa Sub-Port of Mactan. Samtang ang napulo usab ka mga exporters nga gipasidunggan gipangunahan sa Tsuneishi Heavy Industries sa Balamban, Cebu; Cebu Mitsumi. Inc., Lexmark International; Lear Automotive ; Muramoto; Yuen Thai; Metroware; Globalware Manufacturing; Pentax Corp. ug Mactan Apparel.
Gipasidunggan usab ang mga kompaniyang nakatabang sa pagtaas sa koleksiyon sa milabay’ng tuig nga mao ang Pulp Manufacturing Inc.; Profoods Int'l Corp.; CP Kelco Phil. Inc.; Shemberg Marketing Corp.; Newtech Pulp Inc.; FMC Marine Colloids Phils. Inc.; PEBA Trading and Manufacturing Corp.; Cenapro Chemicals Corp. ug 7D Food Int'l Inc.
Atol sa maong kalihukan gipasalamatan ni Silvestre ang maong mga kompanya nga nakasalbar kanila sa implementasyon sa "Attrition Law" human makakuha lamang og -63% sa ilang koleksiyon sa milabay’ng tuig 2011.
Bisan pa og napakyas ang Port of Cebu sa pagkuha sa ilang adjusted annual target nga P8.143 bilyones sa milabay’ng tuig naluwas kini sa -7% pataas nga negatibong koleksiyon aron masilutan base sa balaod sa Attrition Law.
Ang Port of Cebu nakakolekta lamang og P8.093 bilyones o kulang og P51 milyones aron makuha ang ilang target collection sa 2011. Wala pay gipahibalong target collection si BOC Commissioner Ruzzano "Ruffy" Biazon alang ning tuiga. (BANATNEWS)