Disgrasya sa motor 2 patay 5 angol

CEBU, Philippines - Duha ang patay ug lima angol sa mga motorsiklong midasmag sa koral sa managlahing takna ug lugar sa amihanan ug habagatang bahin sa lalawigan sa Sugbo sa miaging Domingo sa kaadlawon.

Ang unang dasmag   didto mahitabo sa barangay Bagatayam lungsod sa Sogod sa amihanang bahin sa lalawigan alas 12:20 sa sayong kaadlawon niadtong Domingo diin namatay ang nagmaneho sa Honda Wave nga si Rommel Flores Baguio , 25, ulitawo nga nagpuyo sa maong lugar.

Samtang naangol ang iyang duha ka angkas nga sila si Junel Blanquiro, 22, ug Jesus Corbo, 21, pulos ulitawo, nga pulos taga barangay Pansoy, sa maong lungsod.

Si SPO4 Reynaldo Branzuela, traffic investigator sa Sogod Police Station mibutyag sa Banat News nga ang mga biktima gikan nga nag-inom sa merkado sa Sogod dayon namauli sila human nila og inom.

Apan gumikan malagmit kay nalipong na sa bino nga ilang giinom, mipabaguros sa pagpadagan sa motorsiklo si Baguio ug pag-abot sa lugar nga may kurbada wala na kini kapugong sa motorsiklo gumikan sa kakusog nga dagan niini busa imbis moliko, mideretso kini og dasmag sa gutter sa karsada.

Silang tulo nagbuwag sa pagpanglupad human malimbuwad ang  ilang sakyanan.

Apan si Baguio kansang ulo nga walay helmet maayong pagkapantok sa sementadong karsada maoy namatay.

Samtang ang iyang duha ka angkas wala maintimano kay wala mapantok ang ilang ulo sa karsada.

Gipanghatod dayon silang tulo ngadto sa Juan Dosado Hospital apan si Baguio gideklarar nga dead on arrival samtang ang iyang duha ka kauban gi-transfer usab dayon sa tambalanan sa dakbayan sa Sugbo tungod sa katalandugon sa kahimtang niini.

Samtang didto sa Poblacion ,lungsod sa Alcantara sa habagatan, namatay usab ang drayber sa motorsiklo ug naangol    ang tulo ka angkas niini human modasmag ang ilang sakyanan sa railing nga puthaw daplin sa karsada   nianang pagka alas 3:00 sa kaadlawon sa maong adlaw.

Si John Dealagdon,18, ulitawo, ug 4th year high school sa Alcantara National High School nga nagmaneho sa motorsiklo maoy nakabsan sa kinabuhi. Samtang naangol sila si Jackson Gelasque, 20, Russel Amorante ug Amy Mag-aso,18, pulos ulitawo ug pulos taga barangay Cabil-isan, Alcantara.

Si PO1 Irish Buena sa Alcantara Police Station mibutyag sa Banat News nga ang mga biktima kusog kaayong nagpadagan sa gisakyan nilang motorsiklo paingon sa lungsod.

Pag-abot sa kurbadang bahin sa karsada nawad-an og control si Dealagdon hinungdan nga imbis moliko , didto moderetso pagdasmag sa railing nga puthaw. Ang ulo ni Dealagdon nga   walay helmet   maayong pagkapantok sa haliging puthaw sa railing nga maoy nakamatay kaniya.   

Silang tanan gihatud dayon ngadto sa Badian District Hospital diin si Dealagdon ideklarar nga patay na ug ang iyang mga angkas maoy napaslak sa tambalanan.(/WC)  (BANATNEWS)