Reluya nangandam sa kombati

CEBU, Philippines - Si kanhi mayor Lakambini “Neneth” Reluya sa lungsod sa San Fernando nangandam na alang sa umaabot nga eleksiyon sa tuig 2013.

Si Reluya kinsa kaalyado sa Alayon Party ni Kongresista Eduardo Gullas sa unang distrito sa lalawigan sa Sugbo nga nahinabi sa Banat News mibutyag nga bisan pa sa mga nasinati niya ug sa iyang kampo sa milabay’ng eleksyon sa 2010, wala gihapon mausab ang iyang plano nga mopadayon sa pagpapili isip mayor sa ilang lungsod sa sunod tuig nga eleksiyon.

Sa milabay’ng eleksiyon si Reluya kinsa incumbent nga mayor sa lungsod napildi ni Antonio “Abby” Canoy nga maoy mayor karon.

Busa miprotesta si Reluya sa pasangil nga gitikasan siya sa iyang kaatbang apan gipanghimakak kining tanan ni Canoy.

Si Reluya nagpanikad na nga makig-rebansin kang Canoy karong umaabot nga eleksyon kay gipangandaman na pag-ayo sa iyang kampo ang tanan.

Matud pa niya nga kanunay na silang nagsabot-sabot alang sa ilang mga plano sa umaabot nga eleksiyon.

Gibutyag usab ni Reluya ang iya nalang bise mayor maoy iyang gipangita karon kay sa mga konsehal may napili na siyang kauban sa partido nga mao sila si Konsehal Noel Tatoy, Rudy Taping, Benny Panuncial ug Ramy Sasuman.

Midugang siya nga sa 21 ka barangay sa lungsod, may unom na ka kapitan nga kaalyado sa ilang grupo nga maoy nagdumala karon sa barangay Ilaya, Pitalo, Sangat, Tananyas, Balud ug sa Panadtaran.  - BANAT NEWS