CEBU, Philippines - Mikitiw ang tiil sa usa ka security guard dihang nasabak kini sa bala sa shotgun nga giduwaan sa kauban niyang guwardiya sa usa ka kan-anan nga nahimutang sa Fuentes Road sa barangay Pajac, dakbayan sa Lapulapu sa miaging gabii.
Ang biktima mao si Gilbert Catubig, 21, ulitawo nga taga barangay Humay-Humay sa Negros Oriental.
Samtang ang aksidenteng nakapusil kaniya mao si Horodino Adlawan Jr., hingkod , nga nagpuyo usab sa maong dapit, ug kauban nga guwardiya sa biktima.
Matud pa ni Lie Vincent Gozalve sa homicide section sa kapolisan sa maong dakbayan nga nahinabi sa Banat News nga kauban nga nag-duty ang biktima ug suspetsado sa Red Coco Resturant nga nahimutang sa maong dapit.
Dugang pa niya nga sa wala pa mahitabo, gihuwaman ni Adlawan ang shotgun sa biktima sanglit .38 kalibreng revolver ra man ang iyang kargada. Unya giablihan ang chamber niini pagpagawas sa mga bala sa maong armas.
Sa pagtuo nga migawas na ang tanang mga bala , gipaduko niini sa yuta ang sumbohan sa maong armas ug gikablit ang gatilyo niini busa mibuto.
Human sa sipa nga buto, mibanos ang siyagit sa biktima kay napisok diay sa bala ang iyang walang tiil.
Gihatod dayon ang biktima ngadto sa Lapulapu City Hospital apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo. - BANAT NEWS