Organic farming sa lalawigan palambuon

CEBU, Philippines - Mibanagbanag na ang dakong kalamboan sa mga mag-uuma sa lalawigan sa Sugbo pinaagi sa pagsagop sa organic farming nga gipasiugdahan ni Gobernador Gwendolyn Garcia.

Subay sa gipanday sa Provincial Agriculturist ug Veterinarian's office nga Organic Agriculture Road Map ilang gipili ang mga pananom ug pamuhi og kahayopan nga angayang palambuon sa nagkadaiyang   mga dapit sa lalawigan.

Sumala pa ni Provincial Veterinarian Dr. Mary Rose Vincoy nga ang ilang gihimo maoy suporta  sa dakong tinguha ni Gobernador Garcia nga labing molambo ang panginabuhi sa kinabag-ang mga Sugboanon didto sa kalungsoran.

Alang kang Vincoy importante kaayo ang pagpakigtambayayong ug kooperasyon sa lokal nga mga opisyal sa kalungsoran kay sila man ang unang mopatuman niini.

Miingon si Vincoy nga pinaagi sa maong programa sa lalawigan sa Sugbo ang produkto unya sa mga mag-uuma nga misagop sa organic farming hatagan og dakong luna sa mga negosyante alang sa sayon nga pagbaligya o pagmerkado niini.

Midugang si Dr. Vincoy nga gawas sa pagpalambo sa kinabuhi sa mga mag-uuma, pinaagi sa organic farming mapalambo usab ang organic nga mga pagkaon dinhi sa lalawigan. (BANATNEWS)