Kontraktor sa reclamation giimbestigar

CEBU, Philippines - Gipatawag ni Gobernador Gwendolyn Garcia ang tag-iya sa E. CAÑEDA CONSTRUCTION, ang contractor sa Phase 1 sa Cordova Reclamation Project nga iya sa kagamhanan sa lalawigan sa Sugbo.

Kini tungod sa pagkalangay sa paghuman sa maong proyekto nga wala na mosubay sa gisaad niining adlaw nga humanon ang proyekto.

Ang gobernador kauban ang mga lokal nga opisyal sa lungsod sa Cordova nga gipangulohan ni Mayor Adelino Sitoy misusi ug nangayo og katin-awan gikan kang Edwin Cañeda sa hinungdan sa kalangay sa pagtrabaho sa maong proyekto.

Sa report ni Provincial Engineer Eulogio Pelayre nasayran nga sulod sa walo ka buwan, 24.51 porsyento lamang ang nahuman nga wala makaabot og 30 porsiyento nga angay unta nilang matuman base sa kontrata.

Sa iyang bahin si Cañeda mirason nga 25.9 porsiyento ang iyang SLIPPAGE o kakulian sa pagtrabaho sa maong proyekto tungod sa kakuwang sa iyang mga dump truck nga mohakot ug mobutang sa mga filling material nunot usab sa pagpunay og ulan-ulan ug ingon na ang paglimiti sa quarry site sa barangay Talamban siyudad sa Sugbo.

Ang gobernador wala modawat sa rason sa nahisgotan nga contractor kay kun nahibawo ang kontraktor sa iyang kakulang angayan unta kining modugang og mga dump trucks aron lamang makuha niini ang gipangayong performance sa maong proyekto.

Si Gobernador Garcia miingon nga tungod sa maong kakulian mahimong mawagtang sa nahisgutang kontraktor ang kontrata sa probinsiya sa paghuman sa Cordova Reclamation Project. Hinuon ang gobernador mihatag kaniya og usa ka buwan aron wagtangon ang iyang slippage.

Subay niini, si Cañeda mipasalig nga dugangan ang iyang mga dump truck ug palapdan ang oras ting-trabaho. (BANATNEWS)