CEBU, Philippines - Mopahigayon og kaugalingong lecture ang kasundalohan sa 28th Infantry Battalion sa Sugbo ngadto sa mga bilanggo sa Danao City Jail nunot sa gikatahong pag-lecture sa usa sa mga bilanggong kanhi lider sa New Peoples Army (NPA) kanila.
Ang maong lider sa NPA nga si Ramon Patriarca kinsa gibalhin na sa Cebu Provincial Detention and Rehabilitation Center (CPDRC) una nang gisuwayan sa korte nga ibalhin og karsel ngadto sa Central Command. Apan gibalibaran sa militar tungod kay wala silay pasilidad nga kabutangan niini ug naglikay silang aduna silay malapas nga tawhanong katungod sa maong rebelde tungod sa kakulang niini sa kaalam pag-atiman og bilanggo.
Si Patriarca gikatahong mipasiugda og lecture ug gituohang nangumbinser sa mga kaubang binilanggo sa Danao City Jail kabahin sa kalihukan sa NPA. Si Lt. Col. Nicolas Mempin nga gikahinabi sa mga tigbalita sa Camp Tapok-Tapok niadtong miaging adlaw mipadayag nga dayag na kaayong sagad nga himuon sa mga NPA ang mangimpluwensiya og mga tawo nga maminaw.Nagtuo ang AFP nga gidaot sa maong rebelde ang gobiyerno pinaagi sa pagpakatap og mga bakak nga pamahayag.
Ang Centcom nananghid sa Bureau of Jail Management and Penology (BJMP) sa City Jail sa Danao nga makig-estorya usab sa mga binilanggo sa maong bilanggoan sa tuyo nga atbangan ang mga gihulagway nilang bakak nga gipanulti ni Patriarca.
Buot nilang mapasabot sa mga bilanggo nga ang gihimo sa kagamhanan nga gitumong lamang alang sa kaayohan sa kinabag-an ug sukwahi kaayo sa ilang nadunggog gikan kang Patriarca nga gitinguha niini nga maoy masilsil ngadto sa ilang mga alimpatakan. (BANATNEWS)