CEBU, Philippines - Usa lang sa 25 ka vintage bombs gipabuto kagahapon sa mga sakop sa Central Command ug Special Weapons and Tactics (SWAT) sa usa ka karaang minahan sa siyudad sa Toledo.
Sumala pa sa chief of staff ni Mayor Michael Rama nga si Philip Zafra nga usa lang ka C4 explosive ang ilang nagamit kagahapon ug gikatakdang ugmang adlawa posibleng mapadayon ang pagpabuto sa nahabiling bomba.
Nasayran nga usa ra ka C4 explosive ang gitagana sa Centcom sa maong operasyon maong usa ra sa 150 pound nga general purpose bomb ang napaulbo.Gipahibalo hinuon ni Zafra nga mohangyo sila sa AFP ug dugang 125 ka C4 explosive aron maoy gamiton sa pagpabuto sa nahibiling bomba.
Ang karaang minahan sa Toledo nga unang gidumala kaniadto sa Atlas Mining Corp. mipahimutang og hugot nga seguridad sa dapit kung diin dunay mga security guard ang nakabantay aron maseguro nga wala’y mga kuryosong tawo ang manulod.
Giklaro hinuon ni Zafra nga dili makagasto ang siyudad sa pag-request og C4 explosive sanglit responsibilidad na kini sa AFP nga moatiman niini kung dunay mga bomba nga makit-an.
Kahinumduman nga ang nahisgutan nga mga vintage bombs nadiskubrihan sa South Road Properties (SRP) sa miaging semana kung diin aksidente kini nga nakubkuban samtang nagpadayon ang beautification project sa maong dapit. (BANATNEWS)