NPA padayon sa pagpangilkil

CEBU, Philippines - Gihingusgan sa mga rebeldeng New People’s Army (NPA) ang ilang operasyon   pagpangilkil sa publiko sa Western Visayas, sumala pa sa tigpamaba sa 3rd Infantry Division sa Philippine Army.

Si Captain Reylan Java, ang tigpamaba sa 3ID mibutyag nga ang mga rebelde nagtigom karon og pundo pinaagi sa pagpalapad sa ilang extortion operations.

 “They have been sending extortion letters to businessmen, elected government officials, and even plain civilians asking for extortion money. The fact that they committed atrocities to their targets could only mean that the victims don’t give in to these extortion demands,” sumala pa ni Java.

Giklaro hinuon sa militar nga sahi ra kaayo kaniadto diin ang mga sibilyan maoy boluntaryong motunol og revolutionary tax ug pundo ngadto sa mga rebelde, ang NPA karon pinugsanay ug dalang pagpanghulga na ang ilang pamaagi aron lang makakolekta og pundo.

“But now, they exact these alleged help through force and intimidation,” dugang pa ni Java.

Gipasangil sa militar nga ang pagpangatake sa mga NPA sa mga ‘soft targets’ aron hadlukon ang publiko ilabi na ang mga magpapatigayon aron mohatag sa ilang gipangayo pinaagi sa gitawag nga "extortion-based violence" tungod sa paghunong na sa publiko pagsuporta sa ilang kawsa.

 Sumala pa sa reports ang pagpangatake sa NPA sa nanglabay’ng katuigan miresulta sa P1.2 billion ($27.7 million) nga danyos sa kabtangan sa milabay’ng tuig ug nakatigom sila pinaagi sa maong pamaagi sa pagpanghulga og P300 milyones.

Gawas nga nimenus na ang suportang nakuha sa mga NPA gikan sa publiko migamay na usab ang mga armadong sakop sa NPA gikan sa 4,300 sa 2010 karon nahimo nalang kining 4,000 niadtong 2011. Matud pa ni Java nga ang mga NPA sa Western Visayas mimenus usab.

Bisan wala makahatag si Java og eksaktong gidaghanon sa naglihok nga mga NPA sa Western Visayas makita ang pagmenus sa mga rebelde niadtong 2011 tungod sa pagtahan sa 110 ka mga rebelde sa gobiyerno.

Dugang pa niini nga namatikdan usab nga mihinay na ang pagpangatake sa mga NPA sa mga sundalo kay ang ilang masayonsayon og atake mao nalang ang mga detachments sa mga CAFGU Active Auxiliaries (CAA) sa mga hilit nga barangay.

Gibutyag usab sa militar nga gibanabanang moabot sa 100 ka sundalo, polis ug militia ang napatay sa NPA sa 2011 komparar sa 184 sa nakalabay pang tuig. Ang NPA sa tuyo nga makatigom og pundo milusad og mga pagpangatake sa nagkadaiyang mga umahan sa Negros Occidental pinaagi sa pagsunog sa mga sakyanan, katubhan, tungod sa wala pagbayad sa mga magpapatigayon sa revolutionary taxes. (BANATNEWS)