Budget sa City Health kuwang

CEBU, Philippines -  Si Cebu City Health chief   Dr. Stella Ygonia mipahayag nga igo-igoon lang nila ang budget nga gi-aprobahan sa konseho alang sa mga tambal sa tuig 2012.

Sumala pa niya nga ang giduso nila nga budget mikabat unta   sa kaping P133 milyones apan P20 milyones lamang ang gitugot sa konseho.

Matud pa ni Ygonia nga kulang kaayo ang maong budget sanglit daghan man ang modangop sa ilang buhatan ilabi na sa mga kabus nga nanginahanglan og tambal.

Gumikan niini, mominos na usab ang stock sa tambal sa mga barangay health center.

Masaligon hinuon si Ygonia nga maka-request sila og supplemental budget sa konseho kung ugaling makuwang gyud ang ilang budget para sa medisina.

Matud pa niya nga importante kaayo ang medisina aron matambalan dayon kadtong mga masakiton nga adto modangop sa mga health center.

Hinuon gipahibalo ni Ygonia nga mohimo usab sila og mga pamaagi aron mapun-an ang stock sa ilang medisina sama sa pagpanawat og mga donasyon gikan sa nagkadaiyang kompanya ug sa pribadong sektor.

Samtang laing budget ang gilaslasan   sa konseho mao ang programa nila nga operation tuli diin sa P4 milyones nilang gipangayo P300,000 ray giaprobahan sa konseho.

Nagkanayon si Ygonia nga sa maong gilig-ong kantidad   gibana-bana nila nga 20 ra ka mga bata ang makabenepisyo niini sa matag barangay.

(BANATNEWS)