Grupo ipatukod pagsulbad sa bangi sa utlanan

CEBU, Philippines - Ang konseho sa dakbayan sa Talisay miawhag kang Mayor Socrates Fernandez sa paggama og technical working group nga maoy moresulba sa lalis bahin sa utlanan tali sa barangay San Roque ug Tanke.

Atol sa regular nga sesyon sa konseho sa siyudad si Charles Basillote, presidente sa Association of Barangay Council (ABC) mipasar og resolusyon bahin sa maong awhag nila sa mayor.

“It is urgently important that data from the actual-on-site resurvey be presented to the appropriate body, in this case- a Technical Working Group that would look into the details of boundary dispute between barangays, most especially that of Barangay San Roque and Tanke”, tipik sa resolusyon ni Basillote nga giaprobahan sa konseho niadtong Martes.

Kahinumdoman nga sayo niining buwana si Kapitan Perla Cabanes sa Tanke mipahibawo sa konseho sa dakbayan bahin sa nagkabug-at nga bangi tali sa iyang barangay ug sa San Roque.

Matud niya nga ang San Roque nangangkon nga sakop sa ilang barangay ang sitio San Rafael ug Kalinaw.

Apan miingon si Cabanes   nga dugay nang panahon nga ang maong mga sitio nahisakop sa Tanke ug gani ang mga residente niini adto magkuha og barangay permit ug magbayad sa ilang buhis sa Tanke.

Ang maong sitwasyon nakahatag og kahasol sa mga residente sa lugar lakip na sa mga opisyal sa nahisgutang duha ka mga barangay hinungdan nga si Cabanes mihangyo sa siyudad nga magpahigayon og actual on-site resurvey sa ilang mga territorial boundaries aron masulbad ang maong problema.

Base usab sa nahisgutang resolusyon ni Basillote ang ubang barangay sama sa Candulawan ug Bulacao kinsa naglalis usab sa ilang mga utlanan kinahanglang survehon pag-usab. (BANATNEWS)