Dasmag sa motor 1 patay 1 angol

CEBU, Philippines - Patay diha-diha ang 34-anyos nga drayber sa motorsiklo samtang kritikal ang 14- anyos niyang angkas human kini makadasmag   og laing sakyanan sa national highway sa barangay Bahay lungsod sa Sibonga niadtong Huwebes sa alas 8:45 sa gabii.

 Ang biktima nga patay dihadiha mao si Monico Natividad, 34, nagpuyo ra sa nahisgutang lugar samtang padayong giatiman sa tambalanan ang angkas niining si Eugene Solatorio,14, nagpuyo usab sa maong dapit.

Padayon pang gipangita sa kapolisan ang sakyanang gikabangga sa mga biktima kinsa wala gayud mohunong aron unta pagsakwat ug pagtabang kanila.

Matud ni PO2 Arnold Ferenal sa Sibonga Police dihang nahinabi sa Banat News nga ang mga biktima gikan sa barangay Poblacion ug nagpaingon sa barangay Bahay dihang pag-abot niini sa maong dapit milikay kini sa gi-parking nga trailer truck.

Apan sa ilang paglikay maoy nasugatan nila ang naghaguros nga sakyanan gikan sa habagatang bahin paingon sa siyudad sa Sugbo busa nagkadinasmagay sila nga maoy namatyan sa drayber ug naangolan usab sa iyang angkas.

Padayon pang gipangita karon sa kapolisan ang sakyanang kadinasmagay sa mga biktima.(/EIM)  (BANATNEWS)