Tomas modagan pagkamayor sa 2013

CEBU, Philippines -  Pormal nga gipahibalo ni South District Congressman Tomas Osmeña ang tinguha niining subling pagpapili pagkamayor sa dakbayan sa Sugbu sa 2013 elections nga posibleng iyang makaatubang ang kanhi niya bise mayor nga karon si Mayor Michael Rama.

Matud pa ni Osmeña nga paninguhaon niyang modaog batok kang Rama ug ilampaso ang mga kandidato unya ni Rama nga naglakip sa mga konsehal. Si Osmeña maoy pangulo sa Bando Osmeña Pundok Kauswagan (BOPK).

Gipahibalo usab ni Osmeña nga si Bise Mayor Joy Augustus Young maoy iyang ikapares sa 2013 apan wala pa siya mohingalan kinsay buot niyang padaganon sa ilang partido sa south district congressional race. Apan aduna nay mga migawas nga mga pangalang posibleng maoy mokandidato nga mao ang kapikas ni Osmeña nga si Konsehal Margot Osmeña , last termer nga si Konsehal Rodrigo “Bebot” Abellanosa ug kanhi konsehal Gerardo Carillo.

Hinuon napanglantawang kadtong mga sakop sa BOPK pagkakonsehal nga mahimo pang makadagan sa 2013 gipaabot nga malakip sa tiket ni Osmeña

Si Osmeña nagkanayon nga nasayop siya sa nakalabay’ng eleksyon tungod sa pagduso kang Rama ngadto sa mga barangay kapitan ug karon buot niyang siya usab maoy mopukan kang Rama sa sunod nga eleksyon. (BANATNEWS)