CEBU, Philippines - Gidunggab patay ang usa ka 51- anyos nga lalaki sa iyang kainom sa usa ka kombira sa kasal dihang ang duha giingong nag-ilog sa mikropono aron mokanta sa video-karaoke diha sa sitio Ylaya sa barangay Bolinawan siyudad sa Carcar niadtong Huwebes sa alas 3:30 sa hapon.
Ang biktima nga patay nang naabot sa tambalanan mao si Concordio Gomez Delica, 51, nagpuyo sa sitio Cambuntan barangay Bolinawan samtang ang suspek mao si Ritchie Noval, 24, nagpuyo ra sa maong dapit.
Matud ni PO1 Alvin Torres sa Carcar City Police Station sa Banat News nga nagkanta kanta ang mga bisita sa kasal samtang nag-inom dihang kalit nga gidunggab sa suspek makadaghang higayon ang biktima.
Ang biktima nasamdan sa walang abaga, tiyan ug walang bahin sa baba ug patay na pag-abot sa Carcar City District Hospital.
Gisusi pa sa kapolisan kung unsay hinungdan sa pagpanunggab gawas lang sa unang impormasyong ilang nadawat nga sa wala pa mahitabo ang pagpanunggab nagkalalis ang duha tungod sa pag-ilogay kinsay mouna og kanta sa videoke.
Ang suspek boluntaryong mitahan sa mga polis ug gikatakdang pasakaan og kaso. (/EIM) (BANATNEWS)