Centcom di andam sa rebel leader

CEBU, Philippines - Dili andam ang Central Command pagdawat sa binilanggong lider sa New Peoples Army nga si Ramon Patriarca tungod sa kakulang sa mga pasilidad ug wala usab sila masuhito sa paggunit og piniriso.

Sa gipadalang suwat sa Central Command kang RTC-Branch 25 Judge Sylvia Paderanga ilang giesplikar nga wala sila’y pasilidad nga kabutangan kang Patriarca ug wala sila’y kaalam pag-atiman niini.

Si Lt. Col. Christopher Tampus ang tigpamaba sa CentCom, mibutyag nga pagka-Miyerkules lang sila sa hapon gipahibalo sa maong plano .

“ Yesterday (Miyerkules) afternoon na na-inform, we should have been properly informed,” pasabot pa ni Tampus.

Mihulagway si Tampus nga ang ilang stockade dili para sa piniriso kini tungod sa kahagip-ot ug kagamay sa bintana niini, makaluluoy usab ang ibutang niini.

“Dili pang piniriso ang stockade gamay kaayo’g bintana maluoy ka sa naa sa sulod and in handling a prisoners lisod na basin naa mi ma- violate nga rights,” pasabot pa ni Tampus. Nasayran nga si Paderanga mipagawas og court order aron mabalhin si Patriarca gikan sa Bureau of Jail Management and Penology-Danao City ug gipabalhin kini sa Cebu Provincial Detention and Rehabilitation Center (CPDRC).

Ang BJMP sa Danao City mireklamong ilang nabantayan si Patriarca nga nag-lecture sa ubang mga piniriso kabahin sa ilang kalihukan sa NPA ug gikabalak-an nilang makadani kini og ubang piniriso.

Niadtong buwan sa Pebrero 2009 nasikop si Patriarca sa barangay Casili lungsod sa Consolacion tungod sa kasong rebelyon. Siya maoy kanhi deputy secretary sa Komiteng Rehiyonal Sentral Bisayas ug finance officer ug pangulo sa taxation bureau sa NPA nga nagbase sa Negros. (BANATNEWS)