Pusher misukol sa mga polis napusilan

CEBU, Philippines -  Naangol ang gitumbok nga number one drug pusher sa siyudad sa Naga human kini giingong misukol sa mga polis nga buot untang modakop kaniya pinasikad sa warrant of arrest diha sa balay niini sa sitio Regla sa Brgy. Jagimit sa Naga City niadtong Miyerkules sa alas 5:00 sa hapon.

Nalandig sa tambalanan si Joseph Reville, nagpuyo sa barangay Langtad kinsa adunay tulo ka warrants of arrest gikan ni Branch 14 RTC Judge Rafael Yrastorza ug Judge Macaundas Hadji Rasul sa Branch 8 tungod sa kaso sa ilegal nga drugas.

Duha ka mga kauban niini nga giingong iyang backup nga sakay usab og motorsiklo ang nakaeskapo human sa pipila ka gutlo nga pakigpinusilay sa mga polis.

Matud ni PO2 Gilmer Noval sa Naga City Police dihang nahinabi sa Banat News ang iyang mga kauban naghatud unta sa warrants of arrest batok ni Reville apan samtang nagpaingon na sa lugar ang mga polis nasugatan nila ang suspek nga sakay og Yamaha nga motorsiklo nga way plaka ug dunay laing duha ka lalaking nagsunod sakay usab og motorsiklo nga gituohang iyang mga         backup.

Pagkakita ni Reville sa mga polis midiretso kini og pamusil ug misunod dayon og pabuto sa ilang mga armas ang mga backup niini hinungdan sa pinusilay.

Si Reville naigo sa sampot ug natagak sa motorsiklo ug wala na makadagan samtang ang duha ka backup niini nakasuotsuot sa kalibonan ug wala na maabti pa.

Nakuha gikan ni Reville ang usa ka kalibre .38 nga dunay sud mga bala. Ang suspek giposasan nga gidala sa Vicente Sotto Memorial Medical Center (VSMMC). (BANATNEWS)