'Pusher' ug backup nga menor nadakpan

CEBU, Philippines - Nadakpan sa buybust operation sa kapulisan ang gipasanginlang notadong tigpayuhot og gidiling drugas sa bukirang bahin sa barangay Ablayan sa lungsod sa Dalaguete niadtong Miyerkules sa alas 4:45 sa hapon.

Apil sa gidakop sa kapulisan ang kauban niini nga taga Duljo-Fatima siyudad sa Sugbo nga nangangkong 17-anyos tungod sa pag -interbinir sa pagdakop sa mga polis ug nadiskubrehang armado og kalibre .45 nga armas.

Ang nadakpan nga gipasanginlang pusher mao si Fidel Belista, 43, nagpuyo sa maong lugar kinsa nakuhaan og gidudahang duha ka paketeng shabu og P500 nga buybust money ingon man ang P3,150 nga gituohang halin niini sa pagpamaligya og gidiling drugas.

Matod ni SPO1 Veronico Centino sa Dalaguete Police Station dihang nahinabi sa Banat News ang ilang hepe nga si Insp. Dexter Basiergo maoy nangulo sa pagpahigayon og buybust operation human makadawat og inpormasyon sa pagpamaligya sa suspek og shabu atol sa pista.

Dihang gitunol sa suspek ang duha ka paketeng ‘shabu’ sa poseur buyer duol sa buwangan gisignit dayon kini sa mga backup nga polis nga nag- alirong sa palibot.

Nianang tungora gikatahong miinterbiner ang 17-anyos ug gipugngan unta ang mga polis pinaagi sa pag-ibot sa iyang kalibre .45 nga pistola apan naunhan kini pagtion ni PO2 Allan Sanoy ug gisikop. Nasuta nga loaded og usa ka magazine nga may tulo ka buhing bala ang armas niini.

Ang duha pulos nagtingkagol na karun sa karsel sa kapulisan ug kagahapong adlawa gihikay ang pagpasaka og tukmang kaso. (BANATNEWS)