2 Koreano gitulis gipabuthan

CEBU, Philippines - Duha ka Korean nationals ang gitulis kagahapon pasado alas- 9 sa buntag diha sa Luzon Avenue, sa Ayala Business Park barangay Mabolo ning dakbayan. Ang mga nabiktima mao silang Kim Hyun, 23 ug Pyun Soo Hyun, 22, pulos nagtungha sa usa ka English school ning dakbayan.

Sa inisyal nga imbestigasyon sa kapolisan nasayran nga ang duha ka biktima bag-ohay lang nga mikanaog sa usa ka taksi kini aron magpailis sa ilang kwarta.

Apan sa kalit lang adunay duha ka tawong sakay sa usa ka motorsiklo ang kalit miduol sa mga biktima ug mition kini sa armas uban sa pagdeklarar og tulis. 

Apan si Kim nagdumili sa paghatag sa bag hinungdan nga nagpabuto ang tulisan sa dalang armas nga maoy nakapausab sa hunahuna sa maong langyaw ug gitunol ang iyang bag.

Human sa maong hitabo mipasirit ang mga tulisan apan ilaha usab gipusil ang gwardiyang si Armando Guerra kinsa daling miresponde ug maayo nalang wala maigo.

Matud pa ni Kim nga ang sulod sa iyang bag mao lang ang usa ka digital camera, libro sa tunghaan ug usa ka electronic nga sigarilyo, sanglit ang iyang kwarta naa ra sa iyang bulsa.

Hinuon wala mahadlok mobalik sa Sugbu si Kim bisan paman sa nahitabo. Gikatakdang mobiya si Kim sa Sugbo karun umaabot buwan sa Pebrero 5. 

Ang hepe sa Theft and Robbery Section (TRS) Insp. Rolando Pinili mibutyag nga nakuha nila ang plaka sa motorsiklo nga 4476 nga maoy gisakyan sa mga tulisan. (BANATNEWS)