Konpirmado ang kapolisan sa hulagway nga namantala

CEBU, Philippines - Gikonpirmar sa kapolisan sa dakbayan sa Sugbo nga ang pakyas nga paglungkab sa usa ka pawnshop sa Gorordo Avenue, barangay Lahug niadtong Domingo mao gyuy   gipakita nilang hulagway niadtong Lunes.

Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) nagkanayon nga base sa pamahayag sa tag-iya sa balay nga giabangan sa usa ka nagpailang Johnny Lo, aduna silay laing saksi ang mitudlo sa hulagway nga ilang gipakita.

Tulo ngadto sa upat ka mga suspek ang giila na sa kapolisan apan duha lang niini ang gihinganlan ni Santander nga mao sila si Kenneth Dayodoy Coplanga nga taga Besao ,La Trinidad, Benguet ug Madrid Batnag.

Ang duha ka suspetsado positibo usab kini nga giila sa tindera sa usa ka dakong hardware sa Pardo nga didto mamalit sa ilang tindahan og mga gamit sama sa fliers, bara ug uban pa niadtong Enero 11, 2012.

Si Sr. Supt. Melvin Ramon Buenafe mitataw nga iyang gimandoan ang iyang mga   sakop nga makig-alayon sa kapolisan sa Negros Island gumikan kay wala nila isalikway ang   dakong posibilidad nga ang maong grupo mao gihapon ang milungkab sa usa ka pawnshop didto sa miaging tuig.

Nagtuo si Buenafe nga adunay nagsuporta sa maong grupo nga usa ka kwartahan sanglit makasarang man kini sa pagpamalit og mga gamit ug ingon man ang pagbayad sa building   nga ilang puy-an unan molungkab sa ilang target.

Gibana-bana ni Buenafe nga ang tanang mga butang   nga ilang nahipos sulod sa giabangang edipisyo sa mga suspetsado mokabat sa P60 mil wala pay labot sa giabang   na niini ngadto sa tag-iya sa building.

Giawhag ni Buenafe ang mga Sugboanon nga kung makit-an nila ang maong mga tawo base sa hulagway nga gipakita na sa mga pamantalaan,   kinahanglang makig-alayon dayon sa mga opisyales sa barangay o kaha direkta ngadto sa kapolisan aron masusi dayon kini.

Si Buenafe nagtuo pa nga sa pagka karon ania gihapon sa Sugbo ang mga suspetsado tungod kay wala kini makabawi sa ilang nagasto human mapakyas ang ilang paglungkab sa Gemmary Pawnshop. Ang alarm system nga misiyagit dihang gisugdan na unta og pasirit sa ilang acetylene ang pultahan sa pawnshop maoy nakasanta sa ilang dautang tuyo.

Nasayran sa kapolisan nga ang maong grupo miabot dinhi sa Sugbo niadtong Enero 5, 2012.  (BANAT NEWS)