Magtiayon naangol sa sunog

Nakaangkon og paso sa ilang nawong ug bukton ang magtiayon human masunog ang ilang giabangang balay kagahapon sa buntag diha sa sitio Ubos Puso sa barangay Basak, San Nicolas siyudad sa Sugbu.

Ang magtiayon mao sila si Alejo ug asawa niining si Loreto Restauro kinsa gidala sa Cebu City Medical Center tungod sa naangkong 2nd degree burns.

Si Cebu City Fire Marshall Sr. Supt. Aderson Comar nga nahinabi sa Banat News mitug-an nga nadawat nila ang alarma sa sunog alas 7:27 ug ilang nakontrolar paglabay lang sa duha ka minutos ug gibanabanang mokabat sa P45 mil ang danyos.

Matud ni Comar nga wala makadako ang sunog tungod kay pulos gilibotan og kongkretong paril ang lugar ug dali sad nakaresponde ang mga tanod sa barangay hall nga nagdala og fire extinguishers.

Apan ang balay nga giabangan sa magtiayong Restauro ang hingpit gyud nga naugdaw ug partially damaged usab ang balay sa tupad nga gipanag-iya ni Arturo Fernandez.

Matud pa ni Comar katol ang hinungdan sa maong sunog.

Si Fernandez nga nahinabi sa Banat News mibutyag nga niadtong higayona naglingkod siya sa gawas dihang iyang nakita nga nag-aso ang gipuy-an sa magtiayon hinungdan nga iyahang gisusi dako na diay ang kalayo.

Si Fernandez nagkanayon nga ang balay nga giabangan sa magtiayong Restauro iyaha kaniadto apan iyang gibaligya sa iyang ig-agaw.

Kini na ang ikaduhang higayon nga dunay mitumaw nga sunog sa maong lugar diin katol ang hinungdan.  (BANATNEWS)