Lawas sa pintor misilaob

CEBU, Philippines - Giluwas sa usa ka enhinyero ang usa ka pintor nga nakuryentihan ug midilaab ang lawas diha sa roof top sa usa ka building diha sa eskina V. Rama ug dalan B. Rodriguez St., sa barangay Guadalupe sa dakbayan sa Sugbu kagahapon sa alas-10 pasado sa buntag.

Si Jovel Pataytay, taga lungsod sa San Fernandez nakaangkon og 3rd degree burn sa iyang nawong ug kalawasan human siya nakuryentihan sa live wire sa gitrabahong edipisyo. Si Allan Limoran, 41, nga taga barangay Camputhaw nga usa ka electrical engineer maoy nakaluwas sa biktima.

Si Limoran miasoy sa Banat News nga nahiagi siya sa maong lugar sakay sa iyang motorsiklo dihang iyang nakit-an sa ibabaw sa building ang biktima nga naghapa ug nagdilaab ang lawas ug nagping-it sa kasakit.

Nasuta nga nakuryentihan kini sa main line sa linya sa kuryente hinungdan nga gidali niya pagsaka ang biktima agi sa damba kilid sa maong building.

“Pagsaka nako iya ko giingnan, tabang bay init kaayo akong lawas! Ako siya giingnan nga tabangon lagi tika pero pugong lang kay kaambakon naman siya (biktima). Pero ang iyang usa ka tiil nasangit sa ‘sin’,” asoy pang Limoran.

Nahurot og kasunog ang gisul-ob nga sapot sa biktima hinungdan nga nangapaslot ang iyang panit sa duha ka bukton, ug ubang parte sa iyang kalawasan lakip na ang nawong niini.

“Kun wala pa lagi ning tawhana (Limoran), siguro patay ‘tong biktima kay moambak naman unta gyud siya sa ubos, may gani nga natabang pa niya,” asoy pa sa usa ka residente nga nakasaksi sa gibuhat ni Limoran nga nakahinabi sa Banat News kinsa mihangyong dili magpahingalan.

Si Cebu City Fire Marshall Sr. Supt. Aderson Comar nga nahinabi sa mga tigbalita nagkanayon nagtuong nasaghiran sa biktima ang mainline sa kuryente diha sa taas.

Ang biktima daling gidala sa Chung Hua Hospital. Ang tag-iya sa maong building nga giingong maoy nagpatrabaho sa biktima diha kagahapon apan wala na magpa- interview sa mga sakop sa media. (BANATNEWS)