CEBU, Philippines - Naalarma ang Department of Veterinary Medicine and Fisheries (DVMF) sa dakbayan sa Sugbu nunot niining mga reklamo kabahin sa mga baho na nga mga karneng manok nga gipamaligya sa nagkadaiyang mga tindahan og karne sa dakbayan.
Si Dr. Alice Utlang, ang hepe sa DVMF miawhag sa publiko nga mokooperar sa ilang buhatan aron masumpo ang mga tindahan nga namaligya og baho nga karneng manok.
Matud pa ni Utlang nga sa unang bahin karong tuiga dunay midangop sa DVMF ug mireklamo nga baho ang napalit nilang manok apan wala dayon kini mapamatud-i gumikan kay dugay kaayo kini nga gitaho sa ilang buhatan.
Tambag ni Utlang sa katawhan nga mismo sa adlaw nga napalit nila ang bahong karne sa manok isumbong kini dayon kanila aron maadto nila ang maong meat shop.
“Kung maabtan man gud og pipila ka adlaw, duna man guy posibilidad nga basin nadaot ang karne sa dihang sila na ang naghipos, lisod gyud na nga sitwasyon,” matud pa ni Utlang sa dihang nahinabi sa Banat News kagahapon.
Giklaro hinuon ni Utlang nga kung matunong nga dili adlaw nga tingtrabaho, kinahanglan nga mo-insister gyud ang kustomer nga pailisan sa tindera ang napalit nilang bahong manok.
Kung dili moilis ang tindera mahimo kining ireklamo sa buhatan sa DVMF inigbalik sa adlaw nga tingtrabaho. Tun-an sa DVMF ang madawat nila nga reklamo ug posibleng masira ang tindahan nga wala motuman sa balaod sa hustong pagpamaligya og karne. - (BANAT NEWS)