CEBU, Philippines - Si Kongresista Eduardo Gullas sa unang distrito sa lalawigan sa Sugbo mibutyag nga matag tuig migahin siya og pundo alang sa pagpananom og mga kahoy sa unang distrito.
Kini human maaprobahi sa pagka-balaod ang House Bill 3524 nga iyang gisang-at niadtong Hulyo 24, 2006.
Kini mao ang Cultural Cebu Protected Management nga naaprobahan pinaagi sa suporta sa mga kaubanan niya sa ubos balay balaoranan ug sa chairman sa Senate Committee on Environment and Natural Resources nga si Senador Pia Cayetano uban ni Senador Serge Osmeña mitabang sa pagkahimong balaod ang maong bill.
Gani matud ni Gullas nga wala siya magdahom nga suportahan ang maong balaodnon ni Senador Osmeña tungod kay ang igsuon niini nga si kanhi Cebu City mayor nga karon Kongresista Tomas Osmeña iya mang gikabangi.
Matud pa niya nga ang lima ka mga siyudad sa lalawigan sa Sugbo nga mao ang Sugbo, Danao, Toledo, Talisay ug Mandaue ug ang mga lungsod sa Minglanilla Consolacion, Compostela, Lilo-an ug Balamban nga adunay 29,062 square kilometers ang gilapdon diin ang 28,452 niini maoy gihimong parcel 1, samtang ang 610 maoy parcel 2 nga maoy naglangkub sa Central Cebu Protected Management. Gipasabot ni Gullas nga ang tumong sa maong balaodnon mao nga maprotektahan ang lima ka mga watershed o tinubdan sa tubig sa maong mga lugar.
Ang mga nahisgutang watershed mao ang Mananga, Kutkot, Lusaran, Buhisan, Central Cebu ug Cebu City.
Gibutyag usab ni Gullas nga ang covered forest sa tibuok Central Cebu human sa World War II adunay gilapdon nga 50 ka ektarya apan karon 25 ektarya na lang kini.
Matud sa Kongresista nga mabantayan nga ang kabukiran sa Sugbo opaw na kini, wala nay mga kahoy nga putlonon busa wala nay kahoy nga maanod ngadto sa suba sa Naga, Carcar, Minglanilla ug Talisay.
“Wala nay dagkung log nga maoy hinungdan nga daghang mga batang nangamatay sa Cagayan de Oro ug Iligan”.
Apan matud ni Gullas nga adunay laing tumong sa pagpananom og kahoy nga mao ang pagprotiher sa mga tinubdan sa tubig kay ang mga gamot sa kahoy maoy mopugong sa tubig sa ilawom sa yuta.
Kung adunay kusog nga uwan motuhop dayon kini sa yuta tungod kay suyopon man sa gamot sa kahoy.
Gibutyag ni Gullas nga matag tuig aduna siya’y gigahin nga pundo alang sa pagpananom og mga kahoy ngadto sa kalungsoran ug mga dakbayan nga ubos sa unang distrito. (BANAT NEWS)