CEBU, Philippines - Gisusi pag-ayo sa kapolisan sa dakbayan sa Mandaue ang nagsunodsunod nga tulis sa taxi sa maong dakbayan.
Si PO1 Milven Pelayo sa Presinto 5 sa barangay Opao Police Station mibutyag sa Banat News nga duha na ka higayon diin ang drayber sa taxi nga gitulis nagbaklay nalang kay gi-carnap pag-apil ang ilang taxi.
Matud pa niya nga ang labing ulahing tulis mao ang nahitabo sa miaging gabii diin ang CTC taxi nga gi-carnap giabandonar sa mga carnapper nga tulisan didto sa sitio Laray sa barangay Nangka, lungsod sa Consolacion alas 4:00 na ang takna sa kaadlawon.
Si Ivan Gervise, 32, nga taga Cogon East sa maong lungsod kinsa maoy nagmaneho sa maong taxi mibutyag sa kapolisan nga tulo ka mga lalaki ang misakay kaniya sa dalan T. Padilla, ug nagpahatod ngadto sa barangay Looc, dakbayan sa Mandaue. Apan pag-abot nila sa maong dapit mimando na usab kining magpahatod ngadto sa barangay Cambaro sa maong dakbayan.
Unya sa didto na sila sa Cambaro kalit lamang siyang gitionan og armas sa tulo ka tulisan uban sa pagdeklarar nga tulis. Sa iyang kahadlok nga patyon siya boluntaryong gihatag niya ang iyang kinitaan nga P1,500 dayon gipakanaug siya sa sakyanan.
Dihang didto na siya sa gawas gipasirit dayon og padagan sa mga tulisan ang iyang taxi.
Si PO1 Pelayo miingon nga ilang gi-follow-up ang maong hitabo ug didto mapalgi ang taxi sa Consolacion.
Nagtuo ang kapolisan nga kining maong modus mahimong mao nay uso karon sa mga tulisan sa taxi nga walay motorsiklo ug maoy ilang gibantayan karon pag-ayo. (BANAT NEWS)