Acetylene gang napalpak

CEBU, Philippines -  Gidemalas ang mga gidudahang sakop sa acetylene gang bisan paman mga milugak na ang hugot nga seguridad sa kapolisan sa dakbayan sa Sugbu sa Sinulog Festival tungod sa mas modernong security system nga ilang nasugamakan.

Ang mga kawatan misuway unta sa paglungkab sa Gemmary Pawnshop and Jewelleries pinaagi sa paghimo og tunnel sa ilawom niini gituohang gisugdan sa duha ka semana gikan sa kasikbit nga lawak sa usa ka edipisyo diha sa dalan Gorordo Avenue ning dakbayan.

Pasado alas 2 kagahapon nautingkay ang mga molupyo sa Gorordo Avenue, barangay Lahug tungod sa kalit nga pagtingog sa alarm system nga gibutang sa maong esablisamento.Si SPO3 Rey Coloscos sa Investigation and Detection Management Branch (IDMB) mibutyag nga gibanabanang sa 10 ngadto 15 metros ang gilay-on sa gihimong tunnel sa gilawmong usa ka metros gikan sa salog sa maong edipisyo.

Matud pa ni Coloscos nga kasagaran sa mga susamang pamaagi sa pagpangawat upat ngadto sa lima ka tawo ang malambigit niini.

Giingong wala dayon makalahos ang tunnel sa maong pawnshop tungod kay didto sila milugwa sa tupad nga establisamento nga tailoring shop sa Angels Sports Wear sa pagtuong mao na kadto ang ilang target tungod sa kabaga sa semento.

Tungod niini ilaha nalang gibangagan ang bungbong sa maong tailoring shop nga tupad sa maong pawnshop.

Apan naputol ang kahinam sa mga kawatan tungod kay dihang nakasulod na sila sa pawnshop ug gidala na ang ilang mga gamit kalit nga mitingog ang security alarm system sa maong establisamento hinungdan nga naglumbaanay sila pagbalik sa lungag sama sa mga ilaga.

Ang tag-iya sa maong pawnshop nga nagdumili sa pagpahingalan mibutyag nga walay angayan ikabalaka ang ilang mga kustomer tungod kay walay nakuhang alahas.

Matud pa sa tag-iya nga ang double lock ug acetylene proof ang ilang vault.

Nakuha sa crime scene, mao ang mga kagamitan nga gigamit sa paghimo og tunnel susama sa bara, pala, acetylene tank ug torch ug uban pang mga gamit. Sa gihimong imbestigasyon sa kapolisan nasayran nga usa ka nagpailang Johnny Lo nga taga Toledo City ang miabang sa commercial space nga gipaabangan ni Aurora Gotingco niadtong Enero 5.

Matud pa ni Gotingco nga daan na siyang nagduda sa maong tawo tungod kay sa dihang iyaha unta kining kuhaan og litrato wala kini mosugot.

“ Mao diay to kay ako man unta siya nga picturan unya wala man siya misugot, nagduda jud ko ato niya,” pasabot pa ni Gotingco sa mga tigbalita.

Mipuyo si Lo pagka petsa 8 sa maong buwan, nahibulong sila nga sukad sa pagpuyo niini wala sila makadungog og kasikas sa maong lawak bisan paman diha magpuyo sa ikaduhang andana si Gotingco.

Ang hepe sa IDMB Chief Insp. Bonifacio Garciano mibutyag sa diha nga nahinabi sa Banat News nga ila karun nga gisusi kun grupo gikan sa kaulohan ang mga kawatan. (EIM)(BANAT NEWS)