Kahingpitan sa sabot-kalinaw tali sa gobiyerno ug RPMP-RPA-ABB gitinguha karong Abril

BACOLOD CITY, Philippines  — Naglaom ang gobiyerno nga masirad-an na sa hingpit ang sabot-kalinaw tali sa gobiyerno ug sa Tabara-Paduano Group (TPG) of the Rebolusyonaryong Partido ng Manggagawa-Pilipinas-Revolutionary Proletarian Army-Alex Boncayao Brigade (RPMP-RPA-ABB) karong bulan sa Abril.

Si Undersecretary Luisito Montalbo sa Office of the Presidential Adviser on the Peace Process (OPAPP), kinsa miduaw sa Bacolod niadtong Huwebes mibutyag nga ang duha ka partido nagkasabot nga tapuson na ang maong kagubot ug sugdan ang transpormasyon sa maong grupo.

“The transformation of the RPMP-RPA-ABB into a political, economic, and social organization engaged in development political work,” matud pa ni Luisito.

Si Montalbo kinsa maoy nangulo sa government panel miingon nga nagkauyon na ang duha ka habig sa ilang mga katuyoan, prinsipyo ug sa mga gikinahanglang kasabutan nga ilakip sa draft agreement human sa ilang tulo ka adlaw nga joint writeshop niadtong Huwebes.

Ang writeshop nga gihimo diha sa Sugarland Hotel sa Bacolod City gitambongan ni RPMP chief Veronica Tabara, RPA-ABB national commander Stephen Paduano alias Carapali Lualhati ug uban pang mga lider sa maong mga rebelde.

Samtang si Montalbo inubanan ni Col. Dickson Hermoso sa Armed Forces of the Philippines Peace Process Office, Assistant Secretary Anselmo Abungan sa Department of Environment and Natural Resources, ug Atty. Joemer Aquino sa OPAPP Legal and Security Unit maoy nagrepresentar sa gobiyerno.

Matud pa ni Montalbo buot sa administrasyong Aquino nga tapuson na ang maong rebelyon sa iyang termino aron dili na magbag-o ang sunod nga administrasyon.

Ang maong mga rebelde adunay 650 ngadto sa 700 ka mga sakop nga gipakatap sa Negros Occidental , Oriental, Panay, Mindanao,ug Metro Manila ug mayoriya kanila (476) nag-operate sa Negros Occidental.

Ang RPMP-RPA-ABB, usa ka breakaway group sa Communist Party of the Philippines-New People’s Army, ug milagda og sabot kalinaw niadtong Disyembre 2000 sa lungsod sa Don Salvador Benedicto, Negros Occidental atol sa administrasyon ni kanhi presidente Joseph Estrada nga gisaksihan sad ni kanhi ambassador Eduardo Cojuangco Jr.

Gipaabot nga ang maong grupo makadawat og pundo pinaagi sa   PAMANA (Payapa at Masaganang Pamayanan (Peaceful and Resilient Communities) alang sa pagpalambo sa mga kabus nga mga taga Negros. (BANATNEWS)